ՔՊ–ից մեկնաբանել են նախագահի պաշտոնում իշխանական թեկնածուի նշանակման հարցը

ԵՐԵՎԱՆ, 26 հունվարի./Նովոստի–Արմենիա/. «Քաղաքացիական պայմանագիր» խմբակցությունը դեռ չի քննարկել նախագահի թեկնածու առաջադրելու հարցը, ասել է խմբակցության պատգամավոր Հրաչյա Հակոբյանը` մեկնաբանելով մամուլում շրջանառվող տեղեկություններն այն մասին, որ «Քաղաքացիական պայմանագիր» խմբակցությունը որոշել է նախագահի պաշտոնում առաջադրել վարչապետի աշխատակազմի ղեկավար Արայիկ Հարությունյանին։


«Նման տեղեկություն ես չունեմ, ոչ էլ քննարկվել է նման հարց խմբակցությունում, ընդհանրապես որևէ մեկի թեկնածությունը չի քննարկվել», – ասել է նա, հաղորդում է «Փաստինֆո»–ին։

Հիշեցնենք, որ հունվարի 23–ին ՀՀ նախագահ Արմեն Սարգսյանը հայտարարել է հրաժարականի մասին։ Որպես պատճառ նա նշել է համակարգային ներքին և արտաքին քաղաքական խնդիրների վրա ազդեցության գործիքների բացակայությունը։

ԱԺ կանոնակարգ օրենքի համաձայն՝ եթե հրաժարականի հրապարակումից հետո 1 շաբաթվա ընթացքում համապատասխան պաշտոնատար անձը (այս դեպքում Արմեն Սարգսյանը) գրավոր դիմումով հետ է վերցնում հրաժարականի իր դիմումը, ապա ԱԺ նախագահն այդ մասին հանդես է գալիս հայտարարությամբ: Իսկ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որը ստորագրում և հրապարակում է ԱԺ նախագահը:–0–