ԵՐԵՎԱՆ, 5 օգոստոսի․/Նովոստի-Արմենիա/․ Հայաստանում կներդրվի կորոնավիրուսի հետ կապված որոշակի սահմանափակումների փաթեթ :
Այս մասին այսօր հրավիրված ասուլիսի ժամանակ հայտնեց ՀՀ ԱՆ Հիվանդությունների վերահսկման և կանխարգելման ազգային կենտրոնի (ՀՎԿԱԿ) իմունականխարգելման բաժնի պետ Սվետլանա Գրիգորյանը:
«Սահմանափակումները շատ խիստ չեն լինի: Նախագծում նախատեսված է ընտրանքային ձևը, այսինքն քաղաքացին ինքն է ընտրում պատվաստվի, թե թեստ հանձնի, որն ունի 2 նպատակ՝ խթանել պատվաստումները և կառավարել վարակի տարածումը»,-ասաց Սվետլանա Գրիգորյանը:
«Իրավունքի զարգացման կենտրոն»ի ՀԿ նախագահ Վիոլետ Զոփունյանն իր հերթին նշեց, որ իրավական տեսանկյունից պարտադիր պատվաստումը մարդու իրավունքների ոտնահարում է:
«Սահմանափակվում են մարդու իրավունքները, և, մասնավորապես, մարդու տեղաշարժումն է սահմանափակվում: Դու պետք է կա´մ պատվաստված լինես, կա´մ ներկայացնես բացասական թեստի պատասխան, այլապես ստացվում է՝ դու չես կարողանա օգտվել քո մի շարք իրավունքներից»,-նշեց նա:
Загружается новость ... "Лево"
Զոփունյանը հավելեց նաև, որ սա բավականին խիստ մոտեցում է զուտ մարդու իրավունքների տեսանկյունից, բայց մյուս կողմից էլ պետք է հասկանալ,թե որքանով է այն համապատասխանում առկա իրավիճակին:
«Այսինքն, պետք է այնպես անել, որ ո´չ մարդու իրավուները ոտնահարվեն, ո´չ էլ վարակելիության ցուցանիշներն աճեն: Կարևոր է համաչափության սկզբունքը պահելով՝ նվազեցնել վարակելիության կամ վիրուսի տարածվածության տեմպերը»,-նշեց նա:
Սվետլանա Գրիգորյանն էլ հավելեց, որ հիմա կարևոր է հաշվի առնել ոչ այդքան անձնական շահը, որքան հանրային շահը, քանի որ գործ ունենք շրջապատի համար վտանգ ներկայացնող վարակի հետ:
Հանրային առողջության մասնագետ Դավիթ Մելիք-Նուբարյանն էլ նշեց, որ մի շարք եվրոպական երկրներում արդեն սահմանափակումներ են դրվել: Մարդիկ ժամանցային միջոցառումներ գնալու համար պետք է ունենան համապատասխան փաստաթուղթ կամ էլեկտրոնային տարբերակով, որը կփաստի, որ անձը պատվաստվել է:
«Սա արվել է 2 պարզ պատճառով: Առաջինը, որ խթանեն պատվաստումները, և երկրորդը, որ հանրային վայրերում թե´ վարակելու, թե´ վարակվելու դեպքերը կրճատվեն: Այսինքն կառավարությունները գտնում են ինչ-որ մի բալանս անհատի և հանրային շահի միջև ՝ ելնելով տվյալ հասարակությունում առկա տեսակետներից»,-ասաց փորձագետը:շ
Նշենք, որ ՀՀ-ում COVID-19-ի դեպքերի թիվը դանդաղ, բայց աճում է։ Նախօրեին կատարվել է 7551 թեստ, հաստատվել է 329 դեպք։ Այսօր ժամը 11:00-ի դրությամբ հաստատվել է կորոնավիրուսային հիվանդության ընդհանուր 231 322 դեպք, որոնցից 220 617-ն` առողջացած, 4632-ը` մահվան ելքով։-0-
