Փաշինյանը մեկնաբանել է չկրակելու կամ սահմանը չպաշտպանելու հրամանի մասին տեղեկությունները

ԵՐԵՎԱՆ, 17 նոյեմբերի./Նովոստի–Արմենիա/. Հնարավոր չէ այնպիսի բան, որ Հայաստանի սահմանների պահպանության վերաբերյալ տրվի չկրակելու կամ սահմանը չպաշտպանելու հրաման:

Այս մասին ասաց վարչապետ Նիկոլ Փաշինյանը ԱԺ–ում կառավարության հետ հարց ու պատասխանի ժամանակ «Պատիվ ունեմ» խմբակցության պատգամավոր Տիգրան Աբրահամյանի հարցին ի պատասխան:

«Դա կլինի ուղիղ պետական դավաճանություն»,- ասաց նա:

Իսկ գերիների մասին հնչած հարցին ի պատասխան` Փաշինյանն ասաց, թե ժամանակն է, որ գերեվարման յուրաքանչյուր դեպք պատշաճ ձևով հետաքննվի:

«Հայաստանի զինված ուժերում ծառայության անցնող յուրաքանչյուր անձ ունի պարտականություններ և պետք է հստակ բոլոր դեպքերով քննվի, թե ինչ է նշանակում գերի են ընկնել, ինչ հանգամանքներում։ Զինվորական կանոնագրերը հստակ սահմանում են, թե որ դեպքում է, որ գերի ընկնելը չի համարվում հանցագործություն»,- ընդգծեց նա:

Փաշինյանի խոսքով՝ ակնհայտ է, որ եթե մարդը վիրավոր ու անգիտակից վիճակում է ու գերեվարվում է, նրան ոչ մի պրիտենզիա չի կարող լինել:

Ընդիմադիր «Պատիվ ունեմ» խմբակցության պատգամավոր Տիգրան Աբրահամյանն էլ իր հերթին նշեց, որ երբ Արշակ Կարապետյանին նշանակում էին պաշտպանության նախարար, նա հայտարարել էր, որ եթե լինի ՀՀ սահմանի նկատմամբ ոտնձգություն, միանգամից Հայաստանը կրակ կբացի:

«Հետպատերազմյան իրավիճակում, երբ մենք անվտանգային խոշոր սպառնալիքների առաջ ենք կանգնած ու մեծածավալ աշխատանքի կարիք ունենք, պաշտպանության երեք-չորս նախարար է փոխվել, ինչի պատճառներն այդպես էլ չիմացվեցին», - նշեց պատգամավորը:

Նիկոլ Փաշինյանն էլ ի պատասխան ասաց, թե ամենևին դեմ չէ, որ հանրությունը բոլոր մանրամասներով իմանա, թե որ որոշումը ինչ հանգամանքներում և ինչ պատճառներով է կայացվել:

«Ես դեմ եմ, որ այդ նկատառումից ելնելով հիմա ասեմ բաներ, որոնց մասին ցանկալի չի, որ իմանան ՀՀ քաղաքացի չհանդիսացող անձինք: Կներեք, ինչքան էլ մենք քաղաքական տարբեր դաշտերում լինենք, ես այս առումով ձեզնից ոչ մի գաղտնիք չունեմ»,- եզրափակեց վարչապետը:

Նոյեմբերի 15–ին ՀՀ նախագահ Արմեն Սարգսյանը վարչապետի առաջարկով պաշտոնից ազատել է ՀՀ պաշտպանության նախարար Արշակ Կարապետյանին և նրա փոխարեն նշանակել Սուրեն Պապիկյանին, ով ավելի վաղ զբաղեցնում էր փոխվարչապետի պաշտոնը։

Պապիկյանի նշանակման հաջորդ օրը` նոյեմբերի 16-ին, ժամը 13։00-ի սահմաններում, ադրբեջանական ԶՈՒ ստորաբաժանումները հերթական սադրանքն են նախաձեռնել ՀՀ արևելյան սահմանագոտու ուղղությամբ՝ գնդակոծության ենթարկելով հայկական դիրքերը։ ՀՀ ԶՈՒ ստորաբաժանումները դիմել են պատասխան գործողությունների՝ հակառակորդի առաջխաղացումը կանխելու նպատակով։Հակառակորդը կիրառել է հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ Ռուսական կողմի միջնորդությամբ ձեռք բերված պայմանավորվածության համաձայն՝ ժամը 18։30-ից ՀՀ արևելյան սահմանագոտում կրակը դադարեցվել է, իրադրությունը հարաբերականորեն կայունացել է։ ՊՆ–ի հաղորդմամբ, Ադրբեջանի սանձազերծած ագրեսիայի հետևանքով հակառակորդի վերահսկողության տակ է անցել 2 մարտական հենակետ։ Հայկական կողմն ունի 1 զոհ, 12 զինծառայող գերեվարվել է, 24–ի զինծառայողի հետ կապը կորել է։ Հակառակորդն ունի մինչև 70 զոհված և վիրավոր զինծառայող, ինչպես նաև զինտեխնիկայի զգալի կորուստներ։–0–