Փաշինյան.մինչև 2026 թ.–ը նախատեսվում է կառուցել, հիմնանորոգել կամ վերանորոգել առնվազն 300 դպրոց
ԵՐԵՎԱՆ, 18 օգոստոսի./Նովոստի–Արմենիա/. Մինչև 2026 թվականը նախատեսվում է կառուցել, հիմնանորոգել կամ վերանորոգել առնվազն 300 դպրոց՝ ապահովելով դրանց ամբողջական հագեցումը անհրաժեշտ գույքով և սարքավորումներով:
Այս մասին այսօր կայացած կառավարության նիստում հայտնեց ՀՀ վարչապետ Նիկոլ Փաշինյանը` ներկայացնելով կառավարության 5–ամյա ծրագիրը:
«Կրթության ոլորտում նախատեսվող աշխատանքները միտված են լինելու քաղաքակիրթ, ստեղծագործ, նախաձեռնող, կարողունակ, մրցունակ և ապագան իր սեփական երկրում պատկերացնող քաղաքացու ձևավորմանը: Ոլորտի զարգացումը սերտորեն կապակցվելու է պետության զարգացման ռազմավարությանը և գերակայություններին»,-ասաց վարչապետը:
Նրա խոսքով ՝ մինչև 2026 թվականը հանրապետության բոլոր դպրոցների բոլոր դասարաններում, ըստ կառավարության ծրագրի, պետք է ապահովել դպրոցական արդիական ու հագեցված ենթակառուցվածքի, ներառական ու զարգացնող միջավայրի, կրթական որակյալ բովանդակության, բարձրորակ ուսուցչական համակազմի և դպրոցների թափանցիկ ու արդյունավետ կառավարման ամբողջություն։
«Բացի այդ մինչև 2026 թվականը հանրապետության բոլոր 1400 դպրոցներում կստեղծվեն ժամանակակից բնագիտական և ինժեներական լաբորատորիաներ՝ էապես բարելավելով կրթության որակը»,-ասաց նա:
Նիկոլ Փաշինյանը նշեց նաև, որ ամբողջությամբ կփոխվեն և կներդրվեն նոր դասագրքեր և ուսումնական նյութեր՝ նոր չափորոշիչների համաձայն: Կբարելավվի մեդիագրագիտության մակարդակը, կզարգացնեն օտար լեզուների, մասնավորապես ռուսերենի, անգլերենի, ֆրանսերենի, նաև տարածաշրջանի լեզուների ուսուցումը:
«Կներդրվեն ուսուցիչների մասնագիտական զարգացման տարբերակված քաղաքականություն՝ ելնելով ուսուցիչների տարբեր խմբերի կարիքներից, աշխատանքային առաջխաղացման, մասնագիտական շարունակական զարգացման և վարձատրության փոխկապակցված մեխանիզմներից: Հնարավորություն կընձեռվի բոլոր ուսուցիչներին ունենալու առնվազն աշխատավարձի 30-50 % բարձրացում»,-ասաց Նիկոլ Փաշինյանը:
Բացի վերը նշվածներից, վարչապետն ընդգծեց, որ կրթությունը հասանելի կլինի սահմանամերձ գոտիներում՝ անկախ համապատասխան մասնագետների առկայությունից:
«Հանրակրթության որակյալ արդյունքի ապահովումն անհնար է առանց նախադպրոցական ծառայությունների ցանցի ամբողջական հասանելիության։ Այս նպատակով նախատեսվում է շարունակել նախադպրոցական ծառայությունների ընդլայնման, դրանց որակի բարձրացման, երեխայի զարգացման ամբողջական միջավայրի ձևավորման, նախադպրոցական հաստատությունների մանկավարժների մասնագիտական կարողությունների շարունակական բարելավման ուղղությամբ»,-եզրափակեց նա։–0–
