Փաշինյան. դիահերձարանում զինվորների մասունքների պահման դեպքից պետք է դասեր քաղենք, բայց կառավարությունը կամ նախարարը չի կարող գնալ, ամեն օր բոլոր տեղերը պտտվել
ԵՐԵՎԱՆ, 3 հունիսի./Նովոստի–Արմենիա/. Կառավարության այսօրվա նիստին վարչապետի պաշտոնակատար Նիկոլ Փաշինյանն անդրադարձավ Աբովյանի դիահերձարանում զոհված զինվորների մասունքների ու դիերի պահման դեպքին:
«Արդյոք սա պետության կամ կառավարության վերաբերմունքն է զոհված զինվորների ու, ընդհանրապես, հանգուցյալների նկատմամբ, այս հարցի պատասխանը գտնելու համար կուզեմ, որ առողջապահության նախարարի պաշտոնակատարը ներկայացնի՝ ինչ է տեղի ունեցել», - ասաց Փաշինյանը:
Առողջապահության նախարարի պաշտոնակատար Անահիտ Ավանեսյանը նշեց, որ մինչև 2018 թվականը նախարարության ենթակայությամբ գործող դատաբժշկական գիտագործնական կենտրոն ունեցել է միայն Երևանի դիահերձարանը, հաղորդում է aysor.am–ը:
Նա ասաց, թե մարզերում ընդհանրապես մասնաճյուղեր չեն եղել:
«Դատաբժշկական ծառայությունը Երևանում ունեցել է 25 սառնարանային տեղ, այժմ ունի մոտ 200 սառնարանային տեղ», - ասաց նախարարի պաշտոնակատարը:
Նրա խոսքով՝ 2018 թվականին ամբողջությամբ վերանորոգվել է Երևանի կենտրոնական դիահերձարանը ու սառնարանները համալրվել են նոր լաբորատոր սարքավորումներով, իսկ 2020-ին նորոգվել է Մեծամորի դիահերձարանը, հիմնանորոգվել է Աբովյանի դիահերձարանը, հիմա էլ լրացուցիչ սառնարանային նոր մաս է կառուցվում, համալրվում է Մարտունու մասնաճյուղը:
«25 տոկոսով աճել է աշխատակիցների աշխատավարձը», - ներկայացրեց Ավանեսյանը:
Վարչապետի պաշտոնակատարն էլ ասաց, թե այս համակարգի բյուջեն 2019 թվականին 2018-ի համեմատությամբ ավելացել է 117 միլիոն դրամով, 2020-ին՝ 230 միլիոն դրամով:
«Հիմա ինչու այս փոփոխությունների արդյունքում ունենք այն տեսարանը, որն ունենք, որովհետև մենք փոխում ենք համակարգը, բայց մարդուն փոխելը այդքան հեշտ գործ չէ», - ասաց Փաշինյանը:
Նա նշեց՝ ԴՆԹ հետազոտությունների սարք 2018 թվականի մայիսից առաջ Հայաստանում չի եղել:
Փաշինյանի խոսքով՝ սա է ցույց տալիս կառավարության վերաբերմունքը տեղի ունեցողի նկատմամբ:
«Այդ միջադեպի հետ առնչվող բոլոր մարդիկ ազատվել են աշխատանքից, բայց երբ համակարգերում բարեփոխոումներ են տեղի ունենում, մենք տեսնում ենք ցույցեր, բողոքներ, որ այ, մարդկանց աշխատանքից ազատում են», - նշեց նա:
Վարչապետի պաշտոնակատարն ընդգծեց՝ դատաբժշկական գիտագործնական կենտրոնի բազմաթիվ աշխատակիցներ այս ընթացքում աշխատել են գործնականում 24 ժամ, շաբաթը յոթ օր՝ առանց դադարի:
«Ընդ որում, ճնշումների ներքո, շատ հաճախ վիրավորանքների ներքո ու նրանց աշխատանքը չի կարելի չգնահատել», - ասաց նա:
Նիկոլ Փաշինյանը նշեց, թե պետք է այս դեպքից դասեր քաղեն, բայց, մյուս կողմից, կառավարությունը կամ առողջապահության նախարարը չի կարող գնալ, ամեն օր բոլոր տեղերը պտտվել ու տեսնել՝ ով ոնց է:
«Այս պահին, ըստ էության, ԴՆԹ հետազոտման աշխատանքը եզրափակիչ փուլին է հասել, մենք ունենք մարմիններ, որոնք չեն նույնականացվել, բայց ունենք նաև անհետ կորածների հարազատներ, ովքեր տարբեր պատճառներով ԴՆԹ նմուշ չեն հանձնել, ունենք նաև նույնականացված մարմիններ, որը տարբեր պատճառներով հարազատների կողմից չի վերցվել, կան օբյեկտիվ ու սուբյեկտիվ պատճառներ, ունենք նաև շուրջ 50 մասունք, որոնցից նույնիսկ 4-րդ, 5-րդ փորձից ԴՆԹ չի անջատվել, պետք է այս դեպքերը պարզելու համար դիմենք միջազգային մեր գործընկերներին», - ասաց Փաշինյանը:
Օերրս սոցցանցերում հրապարակվեցին լուսանկարներ, որոնցում երևում էին պարկերի մեջ դրված դիեր և մասունքներ, որոնք դրված են Դատաբժշկական կենտրոնի հատակին։ Այդ լուսանկարները մեծ աղմուկ էին առաջացրել հասարակության շրջանում։ ՀՀ առողջապահության նախարարի պաշտոնակատար Անահիտ Ավանեսյանը ներողություն է խնդրել Դատաբժշկական կենտրոնի Աբովյանի մասնաճյուղում արձանագրված դիերի և մասունքների ոչ պատշաճ պահման փաստի հետ կապված։
Արցախում զոհված զինծառայողների ծնողները մի քանի օր առաջ փակել էին Հերացի փողոցը, նրանք հայտարարել էին զոհերի մարմինների և մասունքների թվի հետ կապված անճշտությունների մասին։ Կան կասկածներ, որ իշխանությունները երկար ժամանակ թաքցրել են պատերազմի զոհերի մասունքներն արդյունաբերական սառնարաններում` ավելորդ աղմուկից խուսափելու համար։
Ակցիայի մասնակից Արսեն Ղուկասյանը հայտարարեց, որ մի շարք դեպքերում հարազատներին տալիս են զոհերի մասունքները հուղարկավորելու համար, բայց ավելի ուշ հայտարարում են, որ հայտնաբերվել են մարմնի այլ մասեր, որոնք համընկնում են ԴՆԹ–ով։
ՀՀ վարչապետի պաշտոնակատար Նիկոլ Փաշինյանի հանձնարարությամբ նշանակվել է ծառայողական քննություն՝ դիերի և մասունքների պահման պայմանների խնդրի առնչությամբ։
Առողջապահության նախարարությունն իր հերթին հայտնեց, որ ՀՀ ԱՆ «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղի վարիչը և այս գործընթացում ընդգրված 2 աշխատակից ազատվել են աշխատանքից:–0–
