ԵՐԵՎԱՆ, 19 հունվարի./Նովոստի-Արմենիա/. Ազգային ժողովում կառավարության հարց ու պատասխանի ժամանակ «Հայաստան» խմբակցության պատգամավոր Արեգնազ Մանուկյանը էկոնոմիկայի նախարար Վահան Քերոբյանից կրկին հետաքրքրվեց, թե ե՞րբ է նա հրաժարական տալու։
Հիշեցնենք, որ այսօր ավելի վաղ Մանուկյանն ԱԺ-ում հետաքրքրվել էր Քերոբյանից, թե երբ է վերջինս հրաժարական տալու, քանի որ խոստացել էր, որ հրաժարական կտա, եթե 2021թ.-ի արդյունքում չգրանցվի երկնիշ տնտեսական աճ:
«Այսօր իմ ելույթի ժամանակ ես միացրեցի ձայնագրություն, որտեղ դուք ասում էիք` եթե երկնիշ տնտեսական աճ չապահովվի, ապա հրաժարական կտաք: Հարցրեցի, թե երբ եք հրաժարական տալու, բայց դուք ասացիք, թե այդ խոստումը տալով՝պարզապես կատակ եք արել, նշեցիք նաև, որ ձայնագրությունն ամբողջական չէ ու եթե ամբողջական ձայնագրությունը լիներ, ապա պարզ կդառնար, որ դուք կատակել եք»,-ասաց պատգամավորը:
Պատգամավորը միացրեց ամբողջական ձայնագրությունն ու ընդգծեց, որ ձայնագրությունից պարզ է դառնում`Քերոբյանը հաստատ կատակ չի անում:
Բայց Քերոբյանի փոխարեն`հարցին պատասխանեց վարչապետ Նիկոլ Փաշինյանը:
«Պարոն Քերոբյանին ես եմ արգելել հրաժարական տալ, ու ես կորոշեմ յուրաքանչյուր նախարար ու կառավարության անդամ ինչքան կաշխատի ու ինչքան չի աշխատի»,-ասաց վարչապետը:-0-
