ԵՐԵՎԱՆ, 19 հունվարի./Նովոստի–Արմենիա/. Նախնական տվյալներով 15 զինծառայողի մահվան պատճառ դարձած հրդեհը բռնկվել է հրդեհային անվտանգության կանոնների խախտման հետևանքով։
Այս մասին այսօր կառավարության նիստի ժամանակ հայտնեց ՀՀ պաշտպանության նախարար Սուրեն Պապիկյանը։
«Ռազմական ոստիկանության հայտնած նախնական տվյալներով՝ հրդեհային անվտանգության կանոնների խախտման հետևանքով տեղի է ունեցել բռնկում, որի ժամանակ օգտագործվել է նաև արգելված միջոց։ Խոսքը վերաբերում է ավտոբենզինին է, հնարավոր չի եղել հետագայում մարել»,- ասաց Պապիկյանը։
ՀՀ ՔԿ նախագահ Արգիշտի Քյարամյանն իր հերթին նշեց, որ փաստի առթիվ հարուցվել է քրեական գործ ՀՀ ՔՕ 532–րդ հոդվածի 4–րդ մասի հատկանիշներով, այն է շրջապաի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավել անձի մահ։
«Կա նախնական վարկած առ այն, որ հրդեհը տեղի է ունեցել ջեռուցման հետ կապված հարցում անվտանգության կանոնների խախտման պատճառով», – ասաց Քյարամյանը։
Փրկարար ծառայության հաղորդմամբ, հունվարի 19-ին, ժամը 01:15-ին ահազանգ է ստացվել, որ Գեղարքունիքի մարզի Ազատ գյուղում այրվում է շինություն:
Դեպքի վայր են մեկնել երեք մարտական հաշվարկ։ Հրդեհը մեկուսացվել է ժամը 02:58-ին, մարվել՝ 06:33-ին: Այրվել է շինությունը (մոտ 104 քմ)։
ՊՆ–ի հաղորդմամբ, հրդեհի հետևանքով 15 զինծառայող զոհվել է, 3–ի վիճակը ծանր է։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում