ԵՐԵՎԱՆ, 19 ապրիլի./Նովոստի–Արմենիա/. Facebook–յան օգտատեր Հասմիկ Մարտիրոսյանն օրերս իր էջում հրապարակում է արել` նշելով, որ իր քրոջ տղան հետմահու պարգևատրվել է «Արիության» մեդալով, և այն հանձնել է տաքսու վարորդը։
Մարտիրոսյանն իր գրառման մեջ վրդովմունք է հայտնել նման վերաբերմունքի կապակցությամբ։
Արցախի պաշտպանության բանակն այսօր պարզաբանել է ստեղծված իրավիճակը
«Ի պատասխան հայկական լրատվամիջոցներում լայնորեն տարածվող ֆեյսբուքյան օգտատեր Հասմիկ Մարտիրոսյանի՝ «Հադրութում զոհված զինծառայող Ռոբերտ Կարապետյանի «Արիության» մեդալը տուն է բերել տաքսու վարորդը» վերտառությամբ գրությանը՝ անհրաժեշտ ենք համարում տեղեկացնել հետևյալը.
Նախ՝ նշվածը իրականության հետ որևէ աղերս չունի», – նշվում է ՊԲ–ի հաղորդագրության մեջ:
Երկրորդ՝ իրականում Ռոբերտ Կարապետյանի ոչ թե «Արիության համար», այլ՝ «Մարտական ծառայություն» մեդալը հարազատներին է հանձնել ոչ թե տաքսու վարորդը, այլ լեյտենանտ Էդգար Ապրեսյանը, որը մարտական գործողությունների ժամանակ եղել է այն ստորաբաժանմանը աջակցող դասակի հրամանատարը, որի անձնակազմի ներկայացուցիչներից է եղել Ռոբերտ Կարապետյանը:
«Նախապես լ-տ Ապրեսյանը ցանկացել է մեդալը հանձնել զոհված զինծառայողի հարազատներին նրանց հարկի տակ, սակայն ծնողների կողմից մերժում ստանալուց հետո այն հանձնել է զոհված զինծառայողի շիրմաքարի մոտ վերջինիս հորը: Զոհված զինծառայողների պարգևների հանձնման գործընթացը շարունակական է և այն իրականացվում է ոչ միայն զորամաս և ավելի բարձր օղակների հրամկազմի, այլև անմիջական հրամանատարների և մարտական ընկերների մասնակցությամբ: Կոչ ենք անում զանգվածային լրատվամիջոցների ներկայացուցիչներին և սոցիալական ցանցերի անհատ օգտատերերին չշահարկել մեր ժողովրդի համար անչափ զգայուն նշանակություն ունեցող թեմաները և զերծ մնալ չստուգված տեղեկություններ հրապարակելուց», – նշել են ՊԲ–ից:
Հասմիկ Մարտիրոսյանն ավելի ուշ թարմացրել է իր գրառումը` նշելով, որ Արմավիրի քաղաքապետ Դավիթ Խուդաթյանը կապվել է իր հետ, ասել, որ ինքն ու զինկոմիսարիատը իր գրառումից են տեղեկացել Ռոբերտի մեդալի մասին։ Ներողություն է խնդրել, ասել, որ անթույլատրելի է։ Մանրամասներն իմանալու համար կկապվի Ռոբերտի ընտանիքի հետ։
Մարտիրոսյանը նաև ավելացրել է, որ Արմավիրից ԼՀԿ պատգամավոր Անդրեասյան Էդվարդն է գրել իրեն, ներողություն խնդրել կատարվածի համար, մանրամասնրը ճշտելու համար Մարտիրոսյանը տվել է զոհված զինծառայողի մոր կոնտակը։–0–
