Նորքի ինֆեկցիոնի աշխատակիցները բողոքի ակցիա են կազմակերպել` նշելով, որ իրենց ազատում են աշխատանքից, ԱՆ–ն պարզաբանում է իրավիճակը (ՎԻԴԵՈ)

ԵՐԵՎԱՆ, 10 հունվարի./Նովոստի–Արմենիա/. Ինֆեկցիոն հիվանդությունների ազգային կենտրոնի «Նորք» մասնաճյուղի աշխատակիցներն այսօր կազմակերպել են բողոքի ակցիա։


Հիվանդանոցի մոտ 80 աշխատակցի դեկտեմբերի 30-ին տեղեկացրել են, որ ազատելու են աշխատանքից։

Ակցիայի մասնակիցները նշում են, որ դեկտեմբերի 30-ին ժողով են հրավիրել, ասել, որ դիմում գրեն։

«Դիմումի մեջ գրված էր՝ խնդրում եմ՝ մեզ ազատել աշխատանքից` մեր դիմումի համաձայն: Բոլորիս ասացին, որ մինչև հունվարի 15-ն իրավունք ունենք աշխատելու, դրանից հետո ազատված ենք», - նշել են աշխատակիցները։


Նրանք նաև տեղեկացրել են, որ ժողովի ժամանակ հիվանդանոցի իրավաբանն ասել է, որ ազատված են աշխատանքից` անկախ դիմում գրելու հանգամանքից։

Աշխատակիցներից մեկն էլ նշց, թե վաղուց խոսակցություններ կային, որ ինֆեկցիոն հիվանդանոցը փակվելու է, քանի որ վերանորոգում է նախատեսված:

«Բայց խոսակցություն կար, որ մեզ պետք է տեղավորեին ուրիշ տեղեր։ Եկավ էս րոպեն ու մեզ ասացին, թե դիմում գրեք», - ասաց նա։

Առողջապահության նախարարության արձագանքը

Առողջապահության նախարարություն իր հերթին արձագանքել է ստեղծված իրավիճակին` նշելով, որ հիվանդանոցում նախատեսվում են հիմնանորոգման աշխատանքներ։

«Կառավարության 2021-2026 թվականների գործունեության միջոցառումների ծրագրով նախատեսվում է ՀՀ ԱՆ «Ինֆեկցիոն հիվանդությունների ազգային կենտրոնի» մասնաշենքերի հիմնանորոգում: Այս կարևոր ծրագրի արդյունքում, ի վերջո, կունենանք ժամանակակից չափորոշիչներին համապատասխան կենտրոն», – նշվում է գերատեսչության հաղորդագրության մեջ։

ԱՆ–ից պարզաբանում են, որ փետրվարի 1-ից մեկնարկում են «Բ» մասնաշենքի վերակառուցման աշխատանքները և դրանով պայմանավորված` կենտրոնում ծավալվող բժշկական ծառայությունների մի մասը ժամանակավորապես կդադերցվի։

«Բժշկական կենտրոնը դիտարկում է հաստիքացուցակի որոշ փոփոխություններ` բժշկական անձնակազմին անպայմանորեն այլ բժշկական հաստատություններում տեղավորելու հնարավորությունները», – նշել են ԱՆ–ից։–0–