Նաիրա Զոհրաբյանը հայտնել է, թե երբ կավարտվի Ծառուկյանի հարցաքննությունն ԱԱԾ-ում (ՎԻԴԵՈ)
21:44
14 Հունիսի 2020
ԵՐԵՎԱՆ, 14 հունիսի./Նովոստի-Արմեիա/. ԲՀԿ առաջնորդ Գագիկ Ծառուկյանի հարցաքննությունը պետք է ավարտվի 22:00-ին, այս մասին լրագրողների հետ զրույցում հայտնել է ԲՀԿ խմբակցության պատգամավոր Նաիրա Զոհրաբյանը:
Загружается новость ... "Лево"
«Հայտնի է, որ Ծառուկյանն այստեղ է, որ սահմանված 7 ժամ ժամկետ գումարված ընդմիջման ժամկետը, որը լրանում է ժամը 10-ին: Հույս ունեմ, որ իշխանությունը չի գնա իրավիճակի ծայրահեղ լարվածության, սրման, և մենք քիչ անց կտեսնենք Գագիկ Ծառուկյանին: Եթե ոչ, ես և իմ բոլոր գործընկերները, «Բարգավաճ Հայաստանը» պատրաստ է բոլոր հնարավոր զարգացումներին և սցենարներին»,- մանրամասնել է Զոհրաբյանը:
Ընդ որում Զոհրաբյանն ընդգծել է, որ եթե դա չկատարվի, ապա ԲՀԿ բոլոր իր գործընկերները, այդ թվում ինքը, պատրաստ են բոլոր հնարավոր սցենարներին:
«Մենք պատրաստ ենք, որ մեզ կարող են կալանավորել, անձեռնմխելիությունից զրկել, նույնիսկ ամենասյուրռեալիստական, ֆուտուրիստական գործերը կարող են հարուցել: Ասեմ, որ ոչ մի գործիք չի աշխատելու, ասեմ՝ իշխանություն, դուք անցել եք բոլոր կարմիր գծերը, դուք վերջին հնարավորությունն ունեք ՀՀ-ում գործընթացները չդարձնելու անդառնալի և անշրջելի»,- նշել է Զոհրաբյանը:
Արտակարգ դրության պայմաններում ցույցի անցկացման վերաբերյալ, Զոհրաբյանը հայտնել է, որ մարդիկ իրավունք ունեն խաղաղ ակցիայի միջոցով, որոնք օրենքով արգելված չեն, արտահայտելու իրենց անհամաձայնությունը:
Ծառուկյանի շուրջ իրադարձությունների մասին
Հիշեցնենք, որ Այսօր առավոտյան ԱԱԾ աշխատակիցները խուզարկել են «Բարգավաճ Հայաստան» կուսակցության ղեկավար և գործարար Գագիկ Ծառուկյանի առանձնատունը:
Խուզարկությունից հետո ԲՀԿ առաջնորդը հայտարարել է, որ իր վրա գործադրում են քաղաքական ճնշում, սակայն ինքը հետքայլ չի անի:
Այնուհետև Ծառուկյանը կանչվել է ԱԱԾ հարցաքննության:
ԱԱԾ շենքի դիմաց Ծառուկյանի աջակիցները, այդ թվում ԲՀԿ-ական պատգամավորներ ցույց են իրականացնում: Ավելի վաղ ՀՀ ոստիկանությունը բերման է ենթարկել հանրահավաքի 91 մասնակիցների:
Այսօր ԱԱԾ-ն տարածել է մի շարք հաղորդագրություններ:
Հաղորդագրություններից մեկը վերաբերում է Ծառուկյանի ընտանիքին պատկանող «Շանգրի Լա» և «Օնիրա Քլաբ» ընկերությունների ապօրինի գործունեության հետևանքով պետությանը պատճառված ավելի քան 29 միլիարդ դրամի վնասին:
Ըստ մյուս հաղորդագրության, բացահայտվել են 2017 թ.-ին ԱԺ ընտրությունների ժամանակ ԲՀԿ–ի կողմից ընտրողներին կաշառք տալու, կաշառք ստանալու հարյուրավոր դեպքեր:
Իսկ ավելի ուշ ԱԱԾ-ն հաղորդագրություն տարածեց Առինջ համայնքի պաշտոնատար անձանց կողմից համայնքի բյուջեին 339.300.000 դրամի վնաս հասցնելու դեպքի մասին, որի առթիվ քրգործ է հարուցվել:-0-