Մինչև 400 հազ. դրամի վարձատրություն. ՀՀ–ում ուսուցիչների աշխատավարձի դրույքաչափը կբարձրանա
ԵՐԵՎԱՆ, 21 փետրվարի./Նովոստի Արմենիա/. ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել ‹‹Հայաստանի Հանրապետության կրթության՝ մինչև 2030 թ.-ը զարգացման պետական ծրագիրը››:
Փոխնախարար Ժաննա Անդրեասյանն այսօր կայացած ասուլիսի ժամանակ ասաց, որ ծրագրի իրականացումը թույլ կտա, որպեսզի հաջորդ տարի բյուջետային հայտում ներկայացվի ուսուցիչների աշխատավարձերի դրույքաչափի փոփոխության մասին նախագիծ, հավելավճարի սահմանման նոր մոտեցումներ, որոնք թույլ են տալու գնալ մինչև 400 հազար դրամ աշխատավարձ-հավելավճար վարձատրության մեխանիզմին։
Փոխնախարարը վստահեցրեց, որ նոր նախագծով կարևորվում է, որ բոլոր դպրոցները համալրված լինեն որակավորված, ատեստավորված մանկավարժներով, որոնք կստանան արժանապատիվ վարձատրություն։
«Նախատեսվում է ատեստավորման տարակարգերի շնորհման մեխանիզմների ամբողջական վերանայում, ինչպես նաև կամավոր ատեստավորման արդյունքում դրույքաչափի փոփոխություն։ Եկող տարվա բյուջետային հայտում կներկայացնենք ուսուցիչների դրույքաչափի փոփոխության և նաև հավելավճարի սահմանման նոր մոտեցումները, որոնք պետք է թույլ տան գնալ մինչև 400 հազար աշխատավարձ-հավելավճար վարձատրության մեխանիզմին», – նշեց Անդրեասյանը։
Ավելի վաղ վարչապետ Նիկոլ Փաշինյանը կառավարության նիստի ժամանակ ասել էր, որ ուսուցիչների կամավոր ատեստավորման՝ որակավորման վերահաստատման գործընթացի արդյունքում, կախված հավաքած միավորներից, նրանց աշխատավարձերը 2021թ.–ի հոկտեմբերից սկսած կբարձրանան 30-50%-ով: Նա հայտնել էր, որ առաջին փուլում իրականացվել է Հայոց լեզու և գրականություն, Մաթեմատիկա, Պատմություն, Ֆիզիկա, Քիմիա, Կենսաբանություն, Աշխարհագրություն առարկաների ուսուցիչների ատեստավորման ծրագիրը:
ԿԳՄՍ նախարարությունն արդեն ամփոփել է ուսուցիչների կամավոր ատեստավորման առաջին փուլը։ Այս տարի 7-12-րդ դասարաններում դասավանդող մի շարք առարկաների ուսուցիչներ աշխատավարձի հավելավճար ստանալու հնարավորություն են ստացել։ Առարկայական գիտելիքի ստուգմանը մասնակցել է Հայաստանի մոտ 38 000 ուսուցիչներից ընդամենը 1000-ը։ Հավելավճարի համար սահմանված անցողիկ շեմը սակայն հաղթահարել է միայն 48%-ը։ Ամենաբարձր արդյունքը մաթեմատիկայի ուսուցիչներն են ցույց տվել, շուրջ 90%-ը հավաքել է անհրաժեշտ միավորները։ Ատեստավորման գործընթացին մասնակցած 996 ուսուցչից միայն 468-ի աշխատավարձն է բարձրացվել:–0–
