Կտուգանվեն և′ ուղևորները, և′ վարորդները. երթուղայիններում պահանջները կխստացվեն (ՖՈՏՈ,ՎԻԴԵՈ)
ԵՐԵՎԱՆ, 20 օգոստոսի./Նովոստի–Արմենիա/. Oգոստոսի 19-ին վաղ առավոտից ՀՀ քաղաքաշինության, տեխնիկական և հրդեհային անվտանգության տեսչական մարմնի տրանպորտային անվտանգության մասնագետները, առողջապահական և աշխատանքի տեսչական մարմնի մասնագետները և ՀՀ ոստիկանության ծառայողները Covid-19-ի հակահամաճարակային կանոնների պահպանման համատեքստում վերսկսել են Երևանի Կենտրոն և Դավիթաշեն վարչական շրջաններում գործող հանրային տրանսպորտի նկատմամբ համատեղ մշտադիտարկման աշխատանքները, հաղորդում է ՀՀ քաղաքաշինության, տեխնիկական և հրդեհային անվտանգության տեսչական մարմինը։
Տեսչական մարմնինների մասնագետներն ու Ոստիկանության ծառայության կարգախմբերը կանգառներում, ինչպես նաև շրջիկ կերպով մշտադիտարկել են մոտ 200 տրանսպորտային միջոց։
Հայտնաբերվել են իրավախախտման մի շարք դեպքեր։ Վերահսկողության արդյունքում որոշ դեպքերում տրվել են պարտադիր կատարման ցուցումներ, որոշ դեպքերում՝ գրավոր նախազգուշացումներ։ Մի քանի խախտումների դեպքում էլ կազմվել են վարչական արձանագրություններ։
Տեսչական մարմինների կողմից Երևանի հանրային տրանսպորտի գործունեության նկատմամբ վերահսկողությունը կլինի շարունակական։
«Կրկին հիշեցնում ենք, որ պետք է խստագույնս պահպանել սահմանված հակահամաճարակային կանոնները, փակ տարածքներում պարտադիր դիմակ կրել», – նշում են գերատեսչությունից:
Օգոստոսի 17–ից Հայաստանում սահմանվել է փակ տարածքներում դիմակ կրելու անհրաժեշտություն։ Տեսչական մարմինները և ոստիկանությունը զգուշացնում են, որ կորոնավիրուսային հիվանդության դեպքերի թվի աճով պայամանավորված, վերահսկողությունը խստացվում է:
Օգոստոսի 20-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 236 742 դեպք, որոնցից 223 736-ն` առողջացած, 4732-ը` մահվան ելքով։–0–
