Կփակի՞ ՀՀ–ն սահմանն Իրանի հետ կորոնավիրուսի տարածման ֆոնին. պարզաբանում է ԱԳՆ–ն

ԵՐԵՎԱՆ, 22 փետրվարի./Նովոստի–Արմենիա/. «Նովոստի–Արմենիա» գործակալությունը դիմել է ՀՀ ԱԳՆ մամուլի քարտուղար Աննա Նաղդալյանին`խնդրելով պարզաբանել, արդյոք Հայաստանը պատրաստվու՞մ է փակել Իրանի հետ սահմանը կորոնավիրուսի տարածման ֆոնին` հաշվի առնելով մարտի 20–ին նշվող Նովրուզը, որի ժամանակ բազմաթիվ իրանցի տուրիստներ այցելում են Հայաստան։

«Դեռ նման տվյալներ չկան», – նշեց Նաղդալյանը։

Հիշեցնենք, որ Իրանում վարակի առաջին դեպքը գրանցվել է փետրվարի 19–ին։ Այսօր դրությամբ Իրանում կորոնավիրուսից մահացել է 5 մարդ։

Ինչպես հաղորդում է ren.tv–ին, հղում անելով Իրանի առողջապահության նախարարության ներկայացուցիչ Կիյանուշ Ջահանպուրին, Իրանում 2019-nCoV տիպի կորոնավիրուս է ախտորոշվել 28 մարդու մոտ։

Չինաստանի Ուհան քաղաքում, որն ունի 12 մլն բնակչություն, կորոնավիրուսից մահացել է ավելի քան 2300 մարդ, վարակվել են ավելի քան 76 հազարը։ Կորոնավիրուսի վարակման դեպքեր են գրանցվել 27 երկրներում, ապաքինվել է ավելի քան 20 հազար մարդ։ Առողջապահության համաշխարհային կազմակերպությունը կորոնավիրուսի տարածումն անվանել է միջազգային մասշտաբի արտակարգ իրավիճակ։–0–