ԵՐԵՎԱՆ, 26 սեպտեմբերի./Նովոստի–Արմենիա/. Ամենայն Հայոց Գարեգին Երկրորդ Կաթողիկոսը ՀՀ վարչապետ Նիկոլ Փաշինյանի` ԱՄՆ–ից վերադառնալուց հետո մտադիր է քննարկել վարչապետի հայտարարությունները եկեղեցու վերաբերյալ։
Սեպտեմբերի 22–ին Լոս Անջելեսում կայացած ասուլիսի ժամանակ Փաշինյանը մասնավորապես հայտարարել է. «Երբ մենք ասում ենք, որ եկեղեցու ներքին կյանքի մեջ չենք մտնում, որոշ եկեղեցականներ սրանից եզրակացնում և ասում են, որ սրանք նախկին կառավարության նման չեն, եկեք քանդենք այս կառավարության ոտքերի տակ: Նրանք շատ ուժեղ հակահարված կստանան և ծնկի կբերվեն` բառի թե բուն, թե փոխաբերական իմաստով»։
«Ամենայն հավանականությամբ, վարչապետի Հայաստան վերադարձին այդ խնդրի առնչությամբ լուսաբանություններ կունենանք», – ասաց Կաթողիկոսը հինգշաբթի լրագրողներին։
«Մենք պարբերաբար հանդիպում ենք և քննարկում եկեղեցուն ու հայրենիքին հուզող խնդիրներ, հարցեր: Այդ առնչությամբ, հավանաբար, անդրադարձ կլինի այդ խնդրին», –նշեց Գարեգին Երկրորդը։
Լրագրողների խնդրանքով մեկնաբանելով երկրում տիրող ներքաղաքական իրավիճակը` Կաթողիսը նշեց, որ բավականին հարցեր կան, որոնք ծառացած են երկրի առջև, որ հուզում են մեր ժողովրդին և այդ հուզումները, բնականաբար, իրենց արտահայտությունն են գտնում հայրենական մեր կյանքում, ինչպես և սփյուռքի կյանքում։
«Մենք լիահույս ենք, որ բոլոր խնդիրներն իրենց բարվոք լուծումը կստանան: Աղոթում ենք, որպեսզի մեր երկիրն ապրի խաղաղության մեջ, լինի կայուն և առաջընթաց ուղիով զարգանա», – նշեց Գարեգին Երկրորդը։–0–
