ԿԳՆ–ն պարզաբանում է առաջին դասարանցիների էլեկտրոնային գրանցման համակարգում առկա խնդիրները

ԵՐԵՎԱՆ, 15 մայիսի./Նովոստի–Արմենիա/. ՀՀ կրթության և գիտության նախարարության մամուլի քարտուղար Անժելա Կժդրյանը Facebook–յան իր էջում գրառում է կատարել` պարզաբանելով է առաջին դասարանցիների էլեկտրոնային գրանցման համակարգում առկա խնդիրները։

«Էլեկտրոնային կառավարման ենթակառուցվածքների ներդրման գրասենյակի կենտրոնական հանգույցները ծանրաբեռնվածությամբ են աշխատում, այդ իսկ պատճառով բնակչության պետռեգիստրից քաղաքացիները ստացել են տարաբնույթ պատասխաններ, այն է՝ առկա է տարիքի անհամապատասխանություն, ծնող-երեխա կապ, մուտքագրված հանրային ծառայությունների համարանիշով տվյալներ չեն հայտնաբերվում: Այս խնդրի հետևանքով մեկ քաղաքացու կողմից բազմակի գրանցումներ են տեղի ունեցել, այժմ համակարգը աշխատում է նման խնդիրները լուծելու ուղղությամբ: Ներկա պահին արձանագրված բոլոր խնդիրները օպերատիվ կերպով լուծվում են», – նշել է Կժդրյանը։«Ուշադրություն, եթե Ձեր հայտագրումը հաստատվել է, սակայն դեռ էլեկտրոնային նամակ չեք ստացել` մի անհանգստացեք, երեխան հայտագրված է: Նամակը 2-3 օրվա ընթացքում կստանաք», – ընդգծել է ԿԳՆ մամուլի քարտուղարը` կոչ անելով պարբերաբար տեղեկատվություն ստանալու համար հետևել ՀՀ ԿԳՆ էջին։

Առաջին դասարանցիների առցանց գրանցումը մեկնարկել է 2019թ.–ի մայիսի 15–ին տեղական ժամանակով ժամը 09։00–ին։ hayt.emis.am կայքում։

Կայքում գրանցվելուց հետո ծնողը պետք է 15 աշխատանքային օրվա ընթացքում անհրաժեշտ փաստաթղթերը ներկայացնի դպրոց, որտեղ տնօրենը վերջնականորեն կհաստատի գրանցումը։ Հակառակ դեպքում գրանցումը կչեղարկվի և կառաջանա կրկնակի գրանցման կարիք։–0–