ԿԳՄՍ նախարարն անդրադարձել է Հայաստանում ռուսական դպրոցներ բացելու հարցին

ԵՐԵՎԱՆ, 21 հոկտեմբերի./Նովոստի–Արմենիա/. ՀՀ կրթության, գիտության, մշակույթի և սպորտի նախարար Վահրամ Դումանյանն այսօր կառավարության նիստից հետո կազմակերպված ճեպազրույցի ժամանակ անդրադարձավ Հայաստանում ռուսական դպրոցներ բացելու հարցին։

Նա նշեց, որ չի արձանագրել, որ Հայաստանի կառավարության ղեկավար կազմից որևէ պաշտոնյա կամ ՌԴ որևէ բարձրաստիճան պաշտոնյա, մասնավորապես, ՌԴ ԱԳ նախարար Սերգեյ Լավրովն ասած լինի, որ Հայաստանի կառավարությունը պատրաստվում է ռուսական նոր դպրոց բացել։

Լրագրողները մեջ բերեցին Լավրովի հայտարարությունը, որում նա նշել էր. «Տաջիկստանում մեր մեթոդաբանության ուսուցման ամբողջական ծրագրով հինգ ռուսական դպրոց է բացվում։ Այժմ նմանատիպ ծրագիր է պատրաստվում Ուզբեկստանի համար։ Վերջին շրջանում Հայաստանի նոր ղեկավարությունը հետաքրքրություն է ցուցաբերել, որպեսզի նույնպիսի ծրագիր արվի Հայաստանի համար»։

Լավրովի հայտարարության մեջբերումը լսելուց հետո Դումանյանն ասաց, որ նման հարց օրակարգում չկա։

«Վստահ եղեք՝ այս պահին նման հարց օրակարգում չունենք»,- ասաց նա։

Նախարարը նաև ավելացրեց, որ իրենք կարևորում են ռուսաց լեզվի մասսայականացման խնդիրը՝ հատկապես ժամանակակից աշխարհում, երբ հաղորդակցությունը կարևոր գործիք է։–0–