Ջերմուկում ձնաբքի հետևանքով կորած երկու պայմանագրային զինծառայողների գտնվելու վայրը տեղորոշվել է (ՎԻԴԵՈ)

ԵՐԵՎԱՆ, 23  մարտի./Նովոստի–Արմենիա/. Մարտի 21-ին Ջերմուկի մարտական հենակետից մյուս հենակետ անցնելու ընթացքում ձնաբքի հետևանքով  կորած երկու պայմանագրային զինծառայողների գտնվելու վայրը տեղորոշվել է։

Այս մասին հայտնում է tert.am–ը` հղում անելով ՀՀ ՊՆ տեղեկատվության և հասարակայնության հետ կապերի վարչության պետ Գևորգ Ալթունյանին:

«Տեղորոշվելու պահին ողջ են եղել, բայց թե ինչ վիճակում են՝ չեմ կարող ասել», – ասել է նա և նշել, որ փրկարարական աշխատանքներ են իրականացվում: 

Հիշեցնենք, որ մարտի 22–ին ՊՆ–ն հայտնել էր, որ մարտի 21-ին, խիստ ձնաբքի պայմաններում, ՀՀ ԶՈՒ N զորամասի մարտական հենակետից մյուս հենակետ անցնելու ընթացքում կորել է կապը երկու պայմանագրային զինծառայողի հետ։–0–