ՃՈ–ն հայտարարություն է տարածել ԱՊՊԱ–ի հետ կապված տուգանքի կապակցությամբ

ԵՐԵՎԱՆ, 30 նոյեմբերի./Նովոստի–Արմենիա/. Ճանապարհային ոստիկանությունը հայտարարություն է տարածել ԱՊՊԱ պայմանագրի չունենալու դեպքում տուգանք նախատեսող վարչական տույժի կապակցությամբ։

Ինչպես նշվում է հայտարարության մեջ, ավելի քան տասը օր գործող ԱՊՊԱ պայմանագիր չունենալու համար 5000 (հինգ հազար) դրամի չափով տուգանք նախատեսող վարչական տույժ նշանակելու մասին որոշումների և դրանց վերաբերյալ ներկայացվող դիմումների ուսումնասիրությունից պարզվել է, որ բազմաթիվ են դեպքերը, երբ վարչական տույժի են ենթարկվել այն տրանսպորտային միջոցների սեփականատերերը, որոնք ԱՊՊԱ պայմանագիր կնքելուց հետո փոխարինել են տրանսպորտային միջոցների հաշվառման համարանիշերը, սակայն ԱՊՊԱ պայմանագրում այդ փոփոխությունը չեն կատարել։

«Չնայած համապատասխան հիմնավորումները ներկայացնելուց հետո նշված վարչական ակտերը բեկանվում են, սակայն ստեղծված իրավիճակում անհարմարություններից խուսափելու համար տրանսպորտային միջոցների սեփականատերերին հորդորում ենք տրանսպորտային միջոցի հաշվառման համարանիշերի փոխարինման դեպքում դիմել ապահովագրական ընկերություն՝ գործող ԱՊՊԱ պայմանագրում համապատասխան փոփոխություն կատարելու համար», – նշվում է ՃՈ հայտարարության մեջ։–0–