Իրավիճակը Ղարաբաղում և տարածաշրջանում «այնքան էլ կայուն չէ, որքան կուզեինք».Փաշինյանը` Պուտինին և Ալիևին (ՎԻԴԵՈ)

ԵՐԵՎԱՆ, 26 նոյեմբերի./Նովոստի–Արմենիա/. Ղարաբաղում և տարածաշրջանում իրավիճակն այնքան էլ կայուն չէ, որքան կուզեինք։ Այս մասին ուրբաթ հայտարարել է ՀՀ վարչապետ Նիկոլ Փաշինյանը Ռուսաստանի և Ադրբեջանի նախագահներ Վլադիմիր Պուտինի և Իլհամ Ալիևի հետ Սոչիում կայացած եռակողմ հանդիպման ժամանակ։

Փաշինյանը շնորհակալություն է հայտնել Պուտինին այսօրվա եռակողմ հանդիպումը կազմակերպելու համար` բարձր գնահատելով նրա անձնական դերն ու Ռուսաստանի Դաշնության դերակատարությունը նախորդ տարի Արցախում պատերազմի դադարեցման գործում։

«Նոյեմբերի 9–ից հետո արդեն (2020թ.–ի, խմբգր.) ռուսական խաղաղապահ ուժերը տեղակայվել են Լեռնային Ղարաբաղում և Լաչինի միջանցքի երկայնքով։ Ակնհայտ է, որ ռուս խաղաղապահները, Ռուսաստանի Դաշնությունն առանցքային դեր են խաղում Լեռնային Ղարաբաղի և տարածաշրջանում իրավիճակի կայունացման գործում։ Բայց ուզում եմ ընդգծել, որ իրավիճակն այնքան էլ կայուն չէ, որքան կուզեինք», – փաստել է ՀՀ վարչապետը։

Ինչպես նշել է Փաշինյանը, 2020թ.–ի նոյեմբերի 9–ից հետո մի քանի տասնյակ մարդ է մահացել երկու կողմից, միջադեպեր են գրանցվել և Լեռնային Ղարաբաղում, և հայ–ադրբեջանական սահմանին։–0–