ԵՐԵՎԱՆ, 26 փետրվարի./Նովոստի–Արմենիա/. ՌԴ նախագահ Վլադիմիր Պոտինը ՀՀ վարչապետ Նիկոլ Փաշինյանի հետ զրույցի ժամանակ կողմ է արտահայտվել օրենքի շրջանակում հանրապետությունում ստեղծված իրավիճակի կարգավորմանը, ուրբաթ լրագրողներին է հիշեցրել ՌԴ նախագահի մամուլի քարտուղար Դմիտրի Պեսկովը, հաղորդում է ՏԱՍՍ–ը։
«Եթե դուք ուշադիր նայել եք տեքստը, որը հրապարակվել է մեր կողմից (զրույցի արդյունքում), ապա հաստատ հնարավորություն եք ունեցել ընթերցել այն մասին, որ Ռուսաստանի նախագահը կողմ է արտահայտվել օրենքի շրջանակում խնդրի կարգավորմանը», – ասել է Կրեմլի ներկայացուցիչը։
«Սա շատ կարևոր ֆրազ է», – մեկնաբանել է Պեսկովը ՀՀ կառավարության կայքում հրապարակված հաղորդագրությունն այն մասին, որ Պուտինը Փաշինյանի հետ հեռախոսազրույցի ժամանակ իբր աջակցել է հանրապետության օրինական իշխանություններին։
ՌԴ նախագահի մամուլի քարտուղարն ավելացրել է, որր երկու առաջնորդների խոսակցության արդյունքում Կրեմլի կողմից հրապարակված հաղորդագրության մեջ տրվել է «բավականին ամբողջական ձևակերպում, որը բավականին ինֆորմատիվ է»։
Պուտինն ու Փաշինյանը նախօրեին
քննարկել են Հայաստանում ստեղծված իրավիճակը։ ՌԴ նախագահը կողմ է արտահայտվել Հայաստանում կարգուկանոնի և հանգստության պահպանմանը, օրենքի շրջանակում իրավիճակի կարգավորմանը։ ՌԴ նախագահը նաև զսպվածության կոչ է արել բոլոր կողմերին։
Հայաստանի ներքաղաքական իրավիճակի մասին
Հայաստանի Հանրապետության զինված ուժերի գլխավոր շտաբը փետրվարի 25–ին հայտարարություն է տարածել՝ վճռական բողոք արտահայտելով Տիրան Խաչատրյանին գլխավոր շտաբի պետի առաջին տեղակալի պաշտոնից ազատելու առնչությամբ: Զինված ուժերի գլխավոր շտաբը պահանջում է վարչապետի և կառավարության հրաժարականը:
ՀՀ վարչապետ Նիկոլ Փաշինյանն իր հերթին գլխավոր շտաբի հայտարարությունը համարել է ռազմական հեղաշրջման փորձ՝ կոչ անելով իշխանության կողմնակիցներին գնալ Հանրապետության հրապարակ: Ավելի ուշ «Ֆեյսբուքի» իր էջի ուղիղ եթերում վարչապետը հայտնեց, որ որոշել է պաշտոնից ազատել ՀՀ գլխավոր շտաբի պետ Օնիկ Գասպարյանին: ՀՀ նախագահը դեռ չի ստորագրել Օնիկ Գասպարյանին պաշտոնից ազատելու հրամանագիրը։
Փետրվարի 25–ին Երևանում կազմակերպվեցին Փաշինյանի կողմնակիցների և ընդդիմադիրների հանրահավաքները։ Ընդդիմությունը փակեց Բաղրամյանի պողոտան, որտեղ գտնվում է ԱԺ–ի շենքը և հայտարարեց անժամկետ ու շուրջօրյա ակցիաների մասին, որոնք կշարունակվեն մինչև Փաշինյանի հրաժարականը։–0–
