ԵՐԵՎԱՆ, 7 դեկտեմբերի․/Նովոստի-Արմենիա/․ Համաճարակային իրավիճակը լիիրավ հավասար է պատերազմական իրավիճակին, քանի որ թե´ մարդկային կորուստներ են լինում, թե´ տնտեսական վնասներ:
Այս մասին Հանրային հեռուստաընկերության եթերում ասաց բժշկական գիտությունների դոկտոր, պրոֆեսոր, «Արաբկիր» ԲՀ-ի գիտական ղեկավար Արա Բաբլոյանը:
«Երբ խոսում ենք քաղաքացիների առողջության, հանրային առողջապահության մասին, այնպիսի տպավորություն է, որ սա միայն բժիշկների պարտականությունն է, բայց ադպես չէ: Մեր քաղաքացիների առողջության համար պատասխանատու են բոլոր կազմակերպություններն ու գերատեսչությունները»,-ասաց Բաբլոյանը:
Նշենք, որ ՀՀ առողջապահության նախարար Անահիտ Ավանեսյանը ավելի վաղ հայտարարել էր, որ հունվարի 1-ից հանրային սննդի վայրերում, մշակութային միջոցառումներին քաղաքացիների մուտքը կթույլատրվի միայն ՊՇՌ թեստի բացասական արդյունքի կամ պատվաստման հավաստագրի առկայությամբ:
Արա Բաբլոյան հանրային առողջության տեսանկյունից խոսելիս ասաց, որ ընդունվող որոշումը բխում է միայն հասարակության շահերից:
Загружается новость ... "Лево"
Ամերիկյան համալսարանի հանրային առողջապահության ֆակուլտետի դեկան Վարդուհի Պետրոսյանն էլ իր հերթին ասաց, քանի որ գործ ունենք վարակիչ հիվանդության հետ, այդ պարագայում արդեն սահմանափակվում է անհատի ազատությունը, և չի կարող գերիշխել հանրային առողջությունը կյանքի իրավունքին:
«Եվ այս ձեռնարկվող քայլերի առումով, որոնք մեր երկրում աստիճանաբար արվում են, կարծում եմ, որ հատկապես աշխատող բնակչության մեծ մասն արդեն որոշ սահամափակումների ենթարկվել է: Այստեղ ուղղակի նպատակ կա բնակչության այն հատվածի համար, որը խոցելի խումբ է՝ օրինակ 65 տարեկան և ավելի անձինք, որոնց դեպքում մեծ է ռիսկը վարակվելու և մահանալու, պատվաստումը ևս մեկ շարժառիթ լինի »,-ընդգծեց Պետրոսյանը:
«Ռեստորանների ասոցիացիա» ՀԿ նախագահ Աշոտ Բարսեղյանը նշեց, որ սահմանափակումների գնալու հետ մեկտեղ, պետությունը պարտավոր է երաշխավորել, որ այն մարդիկ, ովքեր զբաղված են հասարակական սննդի ոլորտում, չեն կորցնի իրենց աշխատանքը:
«Սա պարզապես պետական հոգածության մասին է խոսքը: Չի կարելի պետական մակարդակում խուճապ տարածել, և պետք է համապարփակ աշխատել բոլոր ուղություններով և բոլոր ոլորտներում՝ հնարավորինս քիչ վնաս հասցնելով տնտեսությանը»,-ասաց Բարսեղյանը:
«Արաբկիր» ԲՀ-ի գիտական ղեկավար Արա Բաբլոյանն էլ ասաց, որ հիմնական նպատակը, ոչ թե ռեստորանները, մշակութային ու ժամանցային վայրերը փակելն է, այլ ստեղծել պայմաններ, որ այդ կենտրոնները կարողանան շարունակել իրենց բնականոն գործունեությունը:
Առողջապահության նախարարության հիվանդությունների վերահսկման և կանխարգելման ազգային կենտրոնի փոխտնօրեն Նունե Բակունցն իր հերթին նշեց, որ գիտականորեն վաղուց ապացուցված է, որ պատվաստվելը նվազեցնում է վարակելիության ծայրահեղ ծանր դեպքերը:
«Այստեղ շատ կարևոր է վարակման կրիտիկական կետերի ժամանակին հայտնաբերումը: Այսինքն հասկանալ՝ որտեղից է գալիս վարակի շղթան, դա կլինի հանրային տրանսպորտը թե մշակութային ու հանրային վայրերը, այդքան էլ էական չէ, այս պարագայում պետք է հայտնաբերել վարակի գոտին ու համապատասխան քայլեր ձեռնարկել, ինչն էլ արվում է»,-ասաց Բակունցը:
ՍԱՏՄ սննդամթերքի անվտանգության վարչության պետ Վահե Դանիելյանը ևս կարևորեց խստացումների, երբեմն նույնիսկ կոշտ սահմանափակումների գնալը հատկապես համաճարակային պայմաններում:
«Հաճախ մենք փորձում ենք բիզնես շահը ավելին դասել, քան հասարակական ու առողջապահական շահը, բայց առաջնային օղակում պետք է լինի բնականաբար առողջությունը, որպեսզի մյուս օղակները ևս կարողանան բնականոն գործել»,-ասաց Դանիելյանը:
Ամերիկյան համալսարանի հանրային առողջապահության ֆակուլտետի դեկան Վարդուհի Պետրոսյանի խոսքով՝ չնայած նրան, որ թվերը նվազում են, այնուամենայնիվ ներկա պահին անհրաժեշտ է խիստ միջոցառումների ձեռնարկումը վարակի հետագա սպասվող ալիքներից խուսափելու համար:
«Այս պահին թե´ պատվաստումների, թե´ վարակելիության առումով ուենենք լավ միտումներ, սակայն դեռևս մենք շատ հեռու ենք ավելի լավ իրավիճակում լինելուց, դրա համար անհրաժեշտ է, որ նման միջոցառումներ ձեռնարկվեն աստիճանաբար պատվաստումների ցուցանիշները բարձրացնելու և կոլեկտիվ իմունիտետ ձևավորելու համար»,-ասաց Պետրոսյանը:
Աղոջապահության մասնագետների խոսքով՝ սահմանափակումների գնալն
ու պահպանելը միայն պետության գործը չէ, դրա համար պատասխանատու է նաև հասարակությունը:-0-
