Հայոց ցեղասպանության 108-րդ տարելիցին նվիրված ջահերով երթի մասնակիցները Երևանի կենտրոնում այրեցին Թուրքիայի և Ադրբեջանի դրոշները (ՖՈՏՈ)

ԵՐԵՎԱՆ, 23 ապրիլի./Նովոստի-Արմենիա/. 1915-1923 թվականներին Օսմանյան կայսրությունում Հայոց ցեղասպանության 108-րդ տարելիցին նվիրված ամենամյա ջահերով երթի մասնակիցները Երևանի կենտրոնում այրեցին Թուրքիայի եւ Ադրբեջանի դրոշները։



Ակցիան կազմակերպել էր ՀՅԴ երիտասարդական թևը։ Նրա հազարավոր մասնակիցներ՝ ջահերը ձեռքներին, Հանրապետության Հրապարակից քայլեցին դեպի Ծիծեռնակաբերդ, որտեղ գտնվում է Ցեղասպանության զոհերի հուշահամալիրը։



Մինչ երթի մեկնարկը ՀՅԴ Գերագույն մարմնի ներկայացուցիչ, ընդդիմադիր պատգամավոր Իշխան Սաղաթելյանը հայրենակիցներին կոչ արեց չհուսահատվել և ընտրել Հայաստանի և Արցախի արժանի ապագայի համար պայքարի ուղին։



«Ապրելու և պայքարելու մեր որոշումը միանգամայն իրատեսական է: Սուտասաններն ու դավաճանները բոլոր նրանք են, ովքեր կարծում են, որ մենք չենք կարող դիմակայել թշնամուն և պետք է հանձնվենք»,- ընդգծեց Սաղաթելյանը։



Դիմելով արցախցի հայրենակիցներին՝ Սաղաթելյանն ընդգծեց, որ իրենք միայնակ չեն, և որ Մայր Հայաստանը դեռևս կանգնած է նրանց թիկունքում՝ ի դեմս այսօր Երևանի կենտրոնում՝ Հանրապետության Հրապարակում հավաքվածների։

«Դեռ ոչինչ ավարտված չէ, գլխավոր պայքարը դեռ առջևում է»,- ասաց նա՝ կոչ անելով պայքարել հանուն Հայաստանի, Արցախի և հայկական նոր վերածննդի։-0-