ԵՐԵՎԱՆ, 6 մայիսի./Նովոստի–Արմենիա/. ՀՀ կառավարությունը հինգշաբթի նիստի ժամանակ որոշում կայացրեց փոփոխություններ մտցնել կարանտինի կարգի մեջ, ինչը պայմանավորված է քաղաքացիների պատվաստման հետ։
Ինչպես նշեց ՀՀ առողջապահության նախարարի պաշտոնակատար Անահիտ Ավանեսյանը, հիվանդության կանխարգելման նոր միջոցների ներդրումը թույլ է տալիս վերանայել սահմանափակումների շրջանակները, քանի որ դրանք ինքնանպատակ չեն և ուղղված են վիրուսի տարածմա կանխմանը։
«Հետևաբար, մենք փորձում ենք պատվաստման գործընթացին և այլ երկրներում փոփոխություններին հետևելուն զուգահեռ դյուրացնել երկրում կարանտինի կետերը», – ասաց Ավանեսյանը։
Նրա խոսքով, այդ փոփոխությունների համաձայն, այն քաղաքացիները, որոնք կունենան «կանաչ անձնագիրը` պատվաստման հավաստագիր, այսինքն` կստանան պատվաստանյութի երկու դեղաչափը, կարող են չհանձնել լրացուցիչ ՊՇՌ թեստ Հայաստան այցելելիս։
«Փաստորեն, սահմանը հատելու համար հիմա որպես նախապայման զուգահեռ և հավասար գործելու է ինչպես ՊՇՌ թեստ հանձնելու հնարավորությունը, այնպես էլ «կանաչ» անձնագրի առկայությունը։ Սա պահանջ է քաղաքացիների համար, որոնք ուզում են մուտք գործել Հայաստան», – ասաց Ավանեսյանը։
Նրա խոսքով, այլ երկրները ևս ունեն պահանջներ, այդ պատճառով մեկնելուց առաջ պետք է ստուգել, թե ինչ պայմաններ են ներկայացվում այդ կոնկրետ երկրում։
Նա նշեց, որ որոշ երկրներ արդեն ներդրել են նման քաղաքականություն, և պատվաստման հավաստագիրը հեշտացնում է մուտքը կամ այցելելու միակ միջոցն է։
Ավանեսյանն ընդգծեց, որ Առողջապահության նախարարության կայքում մանրամասն ներկայացված է, թե ինչպես ներբեռնել և օգտվել հավելվածից, և կարևոր է, որպեսզի քաղաքացիները ևս լավ իրազեկված լինեն ընթացակարգերի մասին։
Նրա խոսքով, Հայաստան մուտք գործելիս հանվում է նաև մեկ տարեկան երեխաների համար պարտադիր ՊՇՌ թեստի պահանջը, քանի որ ուսոմնասիրությունները ցույց են տալիս, որ եթե ծնողներն ունեն բացասական պատասխան, ապա այդ տարիքի երեխայի մոտ էլ այն կլինի բացասական։
Կոնկրետացվել է նաև ՊՇՌ թեստի դրական պատասխան ունեցող քաղաքացիների կամ թեստից հրաժարվող քաղաքացիների մեկուսացման և հոսպիտալացման կարգը։
«Օրենսդրությունը նախատեսում է երկու ռեժիմ. եթե կան որոշակի ախտանիշներ, ապա քաղաքացին ենթակա է հոսպիտալացման, իսկ եթե`ոչ, բայց հրաժարվում է հանձնել թեստ և չունի պատվաստման հավաստագիր, ապա նրա նկատմամբ կիրառվում է մեկուսացման ռեժիմ», – ասաց Ավանեսյանը։
ՀՀ վարչապետի պաշտոնակատար Նիկոլ Փաշինյանն իր հերթին նշեց, որ փաստորեն փոփոխությունները տարածվում են նրանց վրա, ովքեր մեկնում են Հայաստանից։ Պատվաստվածները վերադառնալիս կարիք չունեն հանձնել լրացուցիչ թեստեր։
«Լավ կլիներ, որպեսզի մեր քաղաքացիները մեկնելուց առաջ պատվաստվեն, որպեսզի վերադառնալիս խնդիրներ չլինեն», – ասաց Փաշինյանը։
Նրա խոսքով, երկրորդ փոփոխությունը վերաբերում է զբոսաշրջիկներին, որտեղ ոլորտը դրսևորում է վերականգնման թույլ նշաններ։ Շատ կարևոր է, որպեսզի Հայաստանը հնարավորություն տա զբոսաշրջիկներին, ովքեր արդեն պատվաստվել են, առանց լրացուցիչ ստուգումների մուտք գործել երկիր։–0–
