ԵՐԵՎԱՆ, 29 նոյեմբերի./Նովոստի–Արմենիա/. Հայաստանում 23 քաղաքացի է մահացել, ովքեր եղել են պատվաստված, բայց վարակվել են կորոնավիրուսով, և հիվանդությունը նրանց մոտ ծանր է ընթացել, ասաց ՀՀ առողջապահության նախարար Անահիտ Ավանեսյանն այսօր ասուլիսի ժամանակ։
Загружается новость ... "Лево"
«Նրանց տարիքը 75–ից բարձր է։ Բոլորի մոտ գրանցված են եղել քրոնիկ հիվանդություններ, ինչպիսիք են շաքարային դիաբետ, տարբեր օրգանների չարորակ նորագոյացություններ, սրտի իշեմիկ հիվանդություններ, լյարդի ցեռոզ, հիպերտենզիա, ցարկերակային գերճնշում», – նշեց նախարարը։
Նրա խոսքով, նման հիվանդություններ ունեցող քաղաքացիներն առավել ծանր են տանում կորոնավիրուսը։
Նախարարի տեղեկացմամբ՝ Հայաստանում կորոնավիրուսով հոսպիտալացված քաղաքացիների ընդամենը 3.5 տոկոսն է պատվաստված։ Այս պահի դրությամբ ՀՀ-ում գրանցված է կորոնավիրուսի 13 562 ակտիվ դեպք, որոնցից 1092-ը (8.1 տոկոսը) պատվաստված են:
«Հոսպիտալացված 2900 քաղաքացիներից 102-ն են ամբողջապես պատվաստված՝ ընդամենը 3.5 տոկոսը: Ծանր վիճակում գտնվող քաղաքացիներից ընդամենը 9-ն են ամբողջապես պատվաստված»,-ասաց նա։
Ավանեսյանը հայտնեց, որ Հայաստանի մեծահասակ բնակչության 21.8 տոկոսը ստացել է կորոնավիրուսի դեմ պատվաստանյութի երկու դեղաչափ: Նոյեմբերի 28-ի դրությամբ` Հայաստանում կորոնավիրուսի դեմ պատվաստվել է մոտ 1․2 մլն քաղաքացի։–0–
