ԵՐԵՎԱՆ, 4 դեկտեմբերի. /Նովոստի-Արմենիա/. «Բարգավաճ Հայաստան» խմբակցության դժգոհությունը կապ ունի «Մուլտի-գրուպ»-ում տեղի ունեցող ստուգումների հետ, չորեքշաբթի ասաց ՀՀ վարչապետ Նիկոլ Փաշինյանն ԱԺ–ում կառավարության ժամի ընթացքում։
«Բարգավաճ Հայաստան» խմբակցության պատգամավորները բազմիցս են մտահոգություն հայտնել երկրում անառողջ ներդրումային մթնոլորտի առնչությամբ և նշել, որ ներդրումների մակարդակը նվազում է: Մասնավորապես, կուսակցության առաջնորդ Գագիկ Ծառուկյանն ասել է, որ ինքն օգնել է արաբական շեյխերի ներկայացուցիչներին հանդիպել Երևանի քաղաքապետ Հայկ Մարությանի հետ՝ բիզնես հիմնելու նպատակով, սակայն վերջինիս հետ հանդիպումից հետո ներդրողները հրաժարվել են իրենց նախագծերից:
«Առաջինը, թույլ տվեք վստահ չլինել, որ նշված անձինք շեյխի ներկայացուցիչ են եղել: Եթե լինեին Արաբական Միացյալ Էմիրությունների պաշտոնական ներկայացուցիչ, ապա կարիք չունեին Գագիկ Ծառուկյանին խնդրել, որպեսզի նա զանգի ինձ և խնդրի, որ ես միջնորդեմ Երևանի քաղաքապետին նրանց ընդունելու հարցում: Եթե նրանք շեյխի ներկայացուցիչ էին, ապա դեսպանատան միջոցով կարող էին դիմել մեզ»,- ասել է վարչապետն իր ելույթի ժամանակ:
Փաշինյանը «տարօրինակ» է որակել այն, որ «այդ մակարդակի ներդրողները Երևանի քաղաքապետի հետ հանդիպմանը ներկայացել են «ջինսերով, բոթասներով ու մայկաներով: Սա վերաբերմունք է պետական ինստիտուտի նկատմամբ»:
«Նրանք ասել են՝ Երևանի կենտրոնում հող ենք ուզում՝ բիզնես դնելու համար։ Քաղաքապետն էլ ասել է՝ ցավոք սրտի, ձեր նշած տարածքներով հող Երևանի քաղաքապետարանի տիրապետության տակ չկա, մասնավորը գուցե ունենա, պետք է գնել»,- շարունակել է ՀՀ վարչապետը:
Загружается новость ... "Лево"
Հետո, վարչապետի խոսքով, երբ քաղաքապետը տարբերակներ է առաջրկել, երեք հյուրերի մոտ էլ հեռախոսները սկսել են զանգել:
«Սկզբից մեկն է սկսել խոսել հեռախոսով, քաղաքապետը ընդհատել է իր խոսքը, հետո՝ մյուսը, էլի ընդհատել է խոսքը, բայց որ երրորդին է զանգ եկել, ասել է՝ «ենթադրում եմ խոսակցությունն արդեն հետաքրքիր չի ձեզ, ես, ըստ էության, ավարտեցի, շնորհակալություն, ցտեսություն»,- ասել է Փաշինյանը։
Վարչապետը հայտնել է, որ Մարությանը ճիշտ է արել, որովհետև չի կարելի այդպես վերաբերվել Հայաստանի պետականությանը և հրամայել քաղաքապետին։
«Եվ ես կարծում եմ՝ ճիշտ է արել։ Որովհետև եթե մարդիկ կան, թույլ են տալիս, որ իրենց էդպես վերաբերվեն, և էդպես վարվեն, և իրենց համար Հայաստանի պետականությունն է դա, որ ջինսով, բոթասով պիտի մտնեն, քաղաքապետին ասեն՝ սա, նա․․․ էդ ժամանակները պրծել են»,– նշել է ՀՀ վարչապետը:
««Հյուսիս-Հարավ» նախագիծը շատ լավ ներդրումային միջավայր է եղել, որ բռնել են ՀՀ նախագիծը և որպես կթու կով կթել են, ով հասել է»,- ընդգծել է վարչապետը:
«Հիմա մենք թաթիկները կտրում ենք հատ-հատ, և շարունակելու ենք կտրել, և որևէ մեկը չմտածի, որ ՀՀ դրոշին, պետականությանը, ինքնիշխանությանը, պետական արժանապատվությանը կարող է իր կեղտոտ թաթիկներով կպնել։ Կկտրենք բոլորի թաթիկները։ Սա՝ ի գիտություն»,- եզրափակել է վարչապետը։–0–