«Համարու՞մ եք Շուշին ադրբեջանական քաղաք». Փաշինյանը խոստացել է պատասխանել, բայց միայն մի պայմանով (ՎԻԴԵՈ)

ԵՐԵՎԱՆ,28 հունվարի./Նովոստի–Արմենիա/. ՀՀ վարչապետ Նիկոլ Փաշինյանը Հայկական բանակի կազմավորման 29–րդ տարեդարձի կապակցությամբ «Եռաբլուր» այցելության ժամանակ լեզվակռվի մեջ է մտել լրագրողի հետ, ով հարցրել է, թե նա Շուշին համարում է ադրբեջանական քաղաք։

Մոտենալով լրագրողներին Փաշինյանը հարցրել է, որտեղ է նման բան ասվել, ինչին լրագրողը պատասխանել է. «Խորհրդարանի ամբիոնից»։

«Իմ մեջբերումը թղթի վրա կբերեք, Դուք անձամբ, որ ես ասել եմ, թե Շուշին ադրբեջանական է և ուղիղ եթերում ես Ձեզ կպատասխանեմ», – հայտարարել է Փաշինյանը։

Նա նշել է, որ բանավոր չի պատասխանի, այլ միայն այդ պայմանը կատարելուց հետո։

Այնուհետև Փաշինյանը բարձրաստիճան պաշտոնյաների ուղեկցությամբ մոտեցել է Արցախյան պատերազմում նահատակված զինծառայողների գերեզմաններին ու ծաղիկներ է դրել։

Հունվարի 21–ին ԱԺ–ում կառավարության հարցուպատասխանի ժամանակ ՀՀ վարչապետ Նիկոլ Փաշինյանն ասել է. «Ցանկանում եմ ձեր ուշադրությունը հրավիրել առ այն, որ նախքան ազատագրումը Շուշիի բնակչության 90 և ավելի տոկոսը կազմել են ադրբեջանցիները: Այսինքն՝ դուք ուզում եք ասել, որ 90 և ավելի տոկոս ադրբեջանցի բնակչություն ունեցող Շուշի քաղաքը հայկակա՞ն էր իր այդ կարգավիճակով: Եվ մեկ էլ ասում եք, որ հայտարարել ես, որ Արցախը Հայաստան է, եթե դուք համարում եք, որ Արցախը Հայաստան չէ և դա ձեր դիրքորոշումն է, ուրեմն ձևակերպեք այդ դիրքորոշումը և պաշտոնապես արձանագրեք»։–0–