ԵՐԵՎԱՆ, 17 փետրվարի./Նովոստի–Արմենիա/. Հանրապետության նախագահ, «Հայաստան» համահայկական հիմնադրամի հոգաբարձուների խորհրդի նախագահ Արմեն Սարգսյանն աշխատանքային հանդիպում է ունեցել Հիմնադրամի գործադիր տնօրեն Հայկակ Արշամյանի հետ, հաղորդում է ՀՀ նախագահի մամուլի ծառայությունը:
Հանդիպմանը քննարկվել են հիմնադրամի կողմից իրականացվող և առաջիկա ծրագրերը, այդ թվում՝ Արցախում հումանիտար օժանդակության նախագծերը:
Նախագահ Սարգսյանը կարևորել է աշխարհասփյուռ հայության հանգանակած և «Հայաստան» համահայկական հիմնադրամին նվիրաբերած միջոցների արդյունավետ, պատասխանատու և նպատակային ծախսումը, ծրագրերի իրականացման ընթացակարգերի և ժամկետների խստագույնս պահպանումը, հիմնադրամի գործունեության թափանցիկությունն ու հաշվետվողականությունը, կառույցի հանդեպ վստահությունը:
Загружается новость ... "Лево"
Նախագահ Սարգսյանը նշել է, որ առաջիկայում նախատեսում է հրավիրել հոգաբարձուների խորհրդի արտահերթ նիստ՝ Հիմնադրամի կառավարման և գործունեության հետ կապված խնդիրները քննարկելու և լուծումներ գտնելու նպատակով:
Արցախին ցուցաբերվող օգնության արշավի մասին
Արցախին աջակցելու նպատակով համահայկական դրամահավաքը մեկնարկել էր 2020թ.–ի սեպտեմբերի 27–ին, երբ սկսվեցին մարտական գործողությունները։ Մոտավորապես մեկուկես ամսում հավաքվեց շուրջ 170մլն դոլար։
Հասարակության շրջանում պարբերաբար մտահոգություն է առաջանում այն հարցի շուրջ, Արցախի համար հավաքված միջոցներն ու հումանիտար օգնությունը ոչ նպատակային են ծախսվում և չեն հասնում իրենց հասցեատերերին։
Նոյեմբերի 24–ին հայտնի դարձավ, որ «Հայաստան» հիմնադրամը պետության գանձապետական հաշվին է փոխանցել մոտ 52,7մլն դրամ (շուրջ 102մլն դոլար)` ենթակառուցվածքային, սոցիալական և առողջապահական ծախսերի ֆինանսավորման պայմանով։
Բոլոր միջոցներն ամբողջությամբ փոխանցվեցին միասնական գանձապետական հաշվին`Հայաստանի և Հիմնադրամի կողմից կնքված պայմանագրերի հիման վրա, ինչը մեծ արձագանք ստացավ հայկական հասարակության շրջանում, քանի որ քաղաքացիները կարծում են, որ միջոցները փոխանցվել էին Հիմնադրամին, և դրանք պետք է օգտագործվեին Հիմնադրամի կողմից, այլ ոչ թե պետբյուջեի։
Ինչպես պարզաբանել է ՀՀ ֆինանսների նախարար Ատոմ Ջանջուղազյանը, իրավաբանական տեսակետից Հիմնադրամի գործունեության մեջ խախտումներ չկան` հատկապես հաշվի առնելով այն, որ նվիրատվությունները պետբյուջե իրականացվել են Հիմնադրամի հոգաբարձուների խորհրդի որոշման հիման վրա։–0–