ԵՐԵՎԱՆ, 13 նոյեմբերի./Նովոստի–Արմենիա/. Հ2 հայկական հեռուստաալիքը ցուցադրել է ռեպորտաժ այն մասին` ինչպես է ադրբեջանական հեռուստաընկերության լրագրողը, ով ազգությամբ թուրք է, Երևանի կենտրոնում քաղաքի բնակիչներից հարցազրույց վերցնում հետպատերազմական տրամադրության մասին։ Դրանից հետո Ադրբեջանում և Թուրքիայում ցուցադրվել է ռեպորտաժ այն մասին, թե ինչպես են հայերն իբր հիասթափված և կոտրված 44–օրյա պատերազմի հետևանքով։
Հայերի պատասխաններն ու ադրբեջաներենի սինքրոն թարգմանությունը վերլուծել է ԵՊՀ արևելագիտության ֆակուլտետի դասախոս, ադրբեջանագետ Մարիամ Մելքոնյանը։
Նրա խոսքով, պատասխանների բովանդակությունը տեղ–տեղ խեղաթյուրված է։
«Հայերեն մարդը մի բան է ասում, իսկ նրա խոսքը թարգմանվում է ամբողջովին ուրիշ համատեքստում», – հայտարարեց Մելքոնյանը։
Միաժամանակ ադրբեջանագետն անհնար է համարում, որ հայ լրագրողը կարողանար նման հարցազրույց կազմակերպել Բաքվում։
Նրա խոսքով, Ադրբեջանում ամենաբարձր մակարդակով քարոզվում է հայատյացությունը։
Որպես օրինակ Մարիամը բերում է Բաքվի փողոցներում կազմակերպված հարցումը, որի ընթացքում լրագրողը հարցնում է. «Դուք պատրա՞ստ եք սպանել հայ երեխայի, թե՞ ոչ»։ Հարցվածների մեծ մասը դրական պատասխան է տվել. «Այո, եթե խոսքը հայերի մասին է, մենք պատրաստ ենք, այդ դեպքում պետք չէ տարբերություն դնել կանանց, տղամարդկանց, երեխաների և ծերերի միջև»։
Հեռուստաալիքի ռեպորտաժն իրարանցում է առաջացրել սոցցանցերում։ Մասնավորապես, պրոդյուսեր և հասարակական գործիչ Արմեն Գրիգորյանը ռեպորտաժը հրապարակել է իր Facebook–յան էջում և բացատրություն պահանջել ԱԱԾ–ից։ Հրապարակումը հանգեցրել է ակտիվ քննարկումների։
Հ2–ով ցուցադրված ռեպորտաժի կապակցությամբ «Նովոստի–Արմենիա» գործակալությունը դիմել է Արտգործնախարարություն` մեկնաբանություն ստանալու նպատակով։–0–
