Գյումրիում հարսանյաց հանդեսից հետո թունավորվածների թիվը հասել է 46–ի. ԱՆ

ԵՐԵՎԱՆ, 31 օգոստոսի./Նովոստի–Արմենիա/. Գյումրիում թունավորման ախտանիշներով հոսպիտալացվածների թիվը հասել է 46–ի, նրանցից 43-ը միջամտություն ստանալուց հետո գնացել են տուն։ 

Ինչպես նշվում է ՀՀ առողջապահության նախարարության մամուլի քարտուղար Ալինա Նիկողոսյանի Facebook–յան գրառման մեջ, Գյումրու ռեստորանում կազմակերպված միջոցառումից հետո մինչև այսօր, 7:50-ի դրությամբ հոսպիտալացվել է 46 հիվանդ (9-ը` մինչև 18 տարեկան), որից 43-ը միջամտություն ստանալուց հետո գնացել են տուն։ 

Հիշեցնենք, որ օգոստոսի 30-ին, ժամը 22:00-ի սահմաններում Առողջապահության նախարարություն տեղեկատվություն է ստացվել, որ Շիրակի մարզի Գյումրի քաղաքի բնակիչները փսխումով, ստամոքսի սուր ցավերով հոսպիտալացվել են Գյումրու ինֆեկցիոն հակատուբերկուլյոզային հիվանդանոց։

Անմիջապես նախարարության մասնագետների կողմից ձեռնարկված միջոցառումների արդյունքում պարզվել է, որ բոլորը մասնակցել են Գյումրու «Դվին» ռեստորանում կազմակերպված հարսանյաց հանդեսին։–0–