Գյումրին նոր քաղաքապետ ունի

ԵՐԵՎԱՆ, 1 նոյեմբերի./Նովոստի–Արմենիա/. Քիչ առաջ Գյումրու ավագանին Գյումրու քաղաքապետ ընտրեց;

Ձայների մեծամասնությամբ Գյումրու քաղաքապետ ընտրվեց Վարդգես Սամսոնյանը, ով ներկայացնում է «Բալասանյան» դաշինքը։

Սամսոնյանի թեկնածության կողմ է քվեարկել ավագանու 24 անդամ, 8–ը դեմ է եղել:

Վարդգես Սամսոնյանի թեկնածությանը կողմ են քվեարկել «Բալասանյան դաշինք» և «Քաղաքացիական պայմանագիր» խմբակցությունները: ՀՀԿ, «Զարթոնք» և «Ապրելու երկիր» խմբակցությունները դեմ են քվեարկել Սամսոնյանի թեկնածությանը:

Ավագանու մեկ անդամ քվեարկությանը չի մասնակցել:

Ավելի վաղ հայտնի էր դարձել, որ «Բալասանյան» դաշինքը և «Քաղաքացիական պայմանագիր»-ը համագործակցության մասին հուշագիր են ստորագրել:

Հուշագրով կողմերը պարտավորվում են իրականացնել համատեղ կադրային քաղաքականություն՝ ստանձնելով համատեղ պատասխանատվություն քաղաքի կառավարման համար:

Հուշագիրը ստորագրել են «Բալասանյան» դաշինքից Սոնա Առաքելյանը և «Քաղաքացիական պայմանագիր» կուսակցությունից Քնարիկ Հարությունյանը:–0–