ԵՐԵՎԱՆ, 28 հուլիսի./Նովոստի–Արմենիա/. Գեղարքունիքի մարզպետ Գնել Սանոսյանը ներկայացրել է հայ–ադրբեջանական սահմանին տիրող իրավիճակը։
Հիշեցնենք, որ գիշերը ժամը 03:40-ի սահմաններում, ադրբեջանական ԶՈւ ստորաբաժանումները հերթական անգամ դիմել են սադրանքի և խախտել հրադադարը հայ-ադրբեջանական սահմանի հյուսիս-արևելյան հատվածում:ՊՆ–ից նշում են, որ հակառակորդը, Ռուսաստանի Դաշնության մայրաքաղաք Մոսկվայում նախատեսվող բանակցություններից առաջ, նախահարձակ մարտական գործողություններ է սկսել Հայաստանի Հանրապետության սահմանների վրա` Սոթքից մինչև Վերին Շորժա հատվածում։ Ծավալվել են մարտական գործողություններ, ընթանում է ինտենսիվ փոխհրաձգություն։ Հակառակորդը փորձում է բարելավել իր հենակետերը` ստեղծելով բարենպաստ պայմաններ առաջխաղացման համար։ Ադրբեջանական ստորաբաժանումները, ժամը 09։20-ի դրությամբ, տալով կորուստներ, ետ են շպրտվել իրենց ելման դիրքեր։
«Գիշերվանից սկսվել են հակառակորդի կողմից գործողություններ, որի արդյունքում ունենք երեք զոհ և երեք վիրավոր, վիրավորների վիճակը նորմալ է, կյանքին վտանգ չի սպառնում, և նաև մեկ անհայտ կորած ունենք, այս պահին դեռ ինֆորմացիա չկա։ Իրավիճակը շարունակում է լարված մնալ Սոթքից դեպի լճեր, դեպի Վերին Շորժայի ուղղությամբ։ Մարզի նոր բնագիծը որ ունենք պատերազմից հետո, գրեթե ամբողջ նոր բնագծով կրակում են», – նշել է Սանոսյանը «Ազատություն» ռ/կ–ին տված հարցազրույցում։
Մարզպետը հայտնել է, որ ադրբեջանական զորքերի կողմից եղել են տեղաշարժի փորձեր, բայց հայկական ԶՈւ–ն կանխում է այդ փորձերը։
«Մեր Զինված ուժերը բավականին բարձր մակարդակով դիմակայում են հակառակորդի գրոհներին և հարձակումներին», – ընդգծել է Սանոսյանը։
Անդրադառնալով այն հարցին, թե հրետակոծություն եղե՞լ է, որը կարող էր հասնել նաև քաղաքացիական բնակավայրեր` Գեղարքունիքի մարզպետը նշեց. «Դեռ խոշոր տրամաչափեր չի կիրառվել, որ բնակավայրեր հասներ, բայց երբեմն անկանոն կրակոցներ են վարում, որոնք նաև բնակավայրերի ուղղությամբ է լինում»։
«Պաշտպանության նախարարության բանակային կորպուստի հետ համագործակցված աշխատում ենք, ըստ իրավիճակի կհասկանանք մեր հետագա քայլերը», – եզրափակել է Սանոսյանը։–0–