«Գնացեք, կարդացեք». Քերոբյանը լրագրողին ուղարկեց Telegram

ԵՐԵՎԱՆ, 7 ապրիլի./Նովոստի–Արմենիա/. ՀՀ էկոնոմիկայի նախարար Վահան Քերոբյանն այսօր կառավարության նիստից հետո կազմակերպված ճեպազրույցի ընթացքում չպատասխանեց գնաճի մասին լրագրողի հնչեցրած հարցին։

Լրագրողը Քերոբյանին հարցրեց, թե գնաճային ինչ միտումներ կան շուկայում և արձանագրվու՞մ է, արդյոք, գների նվազում։

«Դուք չե՞ք հետևում պաշտոնական լրատվությանը։ Ապրիլի 5–ին Վիճակագրական կոմիտեն հրապարակեց մարտի ինֆլյացիայի թվերը, չե՞ք կարդացել», – լրագրողին պատասխանելու փոխարեն ասաց նախարարը։

Լրագրողն իր հերթին նշեց, որ այս պահին պաշտոնական տեղեկատվության աղբյուրը հենց նախարարն է, որի միջոցով հասարակությունը ստանում է ավելի պարզ տեղեկատվություն։

«Էկոնոմիկայի նախարարության Telegram ալիքում մանրամասն կա գնաճի մասին։ Խնդրում եմ գնացեք, կարդացեք», – հայտարարեց Քերոբյանն, ինչին ի պատասխան լրագրողը կասկած հայտնեց, որ նախարարը չի տիրապետում թվերին։

«Պարոն նախարար, եթե չեք տիրապետում թվերին, այդպես էլ ասեք։ Ես ձեզ նորից բացատրում եմ լրագրության սկզբունքը. մենք փոխանցում ենք պաշտոնյաների տված ինֆորմացիան հանրությանը։ Հանրության բոլոր շերտերը չէ, որ ունեն և կարդում եմ Telegram», - ասաց լրագրողը։

Քերոբյանը հայտարարեց, որ «չի պատրաստվում անգրագետ հարցերի պատասխանել» ու հեռացավ ճեպազրույցների համար նախատեսված սրահից։–0–