Եթե Ադրբեջանն ունի կոնկրետ տվյալներ, ցանկալի կլինի, որ մեզ փոխանցի, պատրաստ ենք համատեղ հետաքննության.Փաշինյանը` Սյունիքում ստեղծված բարդ իրավիճակի մասին (ՎԻԴԵՈ)
ԵՐԵՎԱՆ, 27 օգոստոսի./Նովոստի–Արմենիա/. ՀՀ վարչապետ Նիկոլ Փաշինյանը կառավարության նիստի ժամանակ անդրադարձել է Սյունիքում ստեղծված բարդ իրավիճակին։
Նշենք, որ Ադրբեջանը արդեն երկրորդ օրն է`փակ է պահում որոշ ճանապարհներ Սյունիքում։ Հայաստանի ազգային անվտանգության ծառայությունը օգոստոսի 26–ին հաղորդեց, որ օգոստոսի 25-ին, ժամը 23: 00-ի սահմաններում, ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: Օգոստոսի 26–ին հայտնի դարձավ, որ Ադրբեջանը փակել է նաև Գորիսից Որոտան տանող ճանապարհը, ինչի հետևանքով կաթվածահար է եղել Հայաստան–Իրան ճանապարհով ազատ տեղաշարժը, մյուս բնակավայրերից գրեթե ամբողջությամբ կտրվել են Որոտանը, Շուռնուխը, Բարձրավան գյուղերը, Կապանի Նոր Առաջաձոր գյուղի մի թաղամասը։
«Այս գործողությունւը հակասում է 2020թ.–ի դեկտեմբերին ձեռք բերված պայմանավորվածություններին, և ես հույս ունեմ, որ իրավիճակը րոպե առաջ կկարգավորվի։ Քաղաքական առումով ինձ համար միանշանակ է, որ այդ ակցիան արվել է մեր առաջ քաշած խաղաղության օրակարգին հարվածելու, այդ օրակարգը վարկաբեկելու համար», – ասաց Փաշինյանը։
Նա նշեց, որ Ադրբեջանը պահվածքը վկայում է, որ նման միջադեպեր էլի կարող են լինել։
«Մեր ծառայությունները պետք է զգոն լինեն և ուշադիր, բայց մյուս կողմից մեզ ամուր նյարդեր են պետք, և մենք մեր ռազմավարական գիծը` խաղաղության օրակարգը, պիտի զարգացնենք, առաջ տանենք։ Սյունիրքի ճանապարհների հետ կապված իրադրության ստեղծումը մեզ համար անկանխատեսելի չէր, և մենք այդ ընթացքում աշխատել ենք նոր ենթակառուցվածքների ձևավորման ուղղությամբ ու շարունակելու ենք աշխատել, սակայն Էյվազլի և Չայզամի հատվածներում ճանապարհի վերաբացումը տարածաշրջանային կայունության շատ լավ խորհրդանիշ կարող է դառնալ», – ասաց Փաշինյանը։
Նա նաև նշեց, որ ադրբեջանական կողմը պնդում է, որ ստեղծված իրադրությունը կապվում է նախորդ օրը տեղի ունեցած միջադեպի հետ, երբ դանակահարվել է Ադրբեջանի սահմանապահ զորքերի ծառայող (ՀՀ ՊՆ–ն հերքել է այդ տեղեկատվությունը, խմբգր)։
«Մեր նախնական ստուգումները ցույց են տվել, որ հայկական կողմը որևէ առնչություն չունի ենթադրվող միջադեպի հետ, նաև ԱԺ–ում ամբիոնից հայտարարել են,որ եթե ադրբեջանական կողմն ունի կոնկրետ տվյալներ, ցանկալի կլինի, որ մեզ փոխանցի, պատրաստ ենք նաև համատեղ հետաքննության` Հայաստանի, Ռուսաստանի և Ադրբեջանի ներկայացուցիչների մասնակցությամբ։ Միջհամայնքային ճանապարհների նորոգման, հիմնանորոգման մեր ծրագրերը, մասնավորապես Սյունիքի մարզում, պիտի իրականացնենք, մինչև տարեվերջ Տաթև–Աղվանի ճանապարհի հիմնանորոգումը պիտի ավարտվի։ Նախանշված մյուս հատվածների ճանապարհաշինարարական աշխատանքները նույնպես պետք է ավարտենք, համայնքների անխափան կապը մարզկենտրոնի միջպետական և հանրապետական նշանակության ճանապարհների հետ ավելի որակյալ դարձնելու համար», – ասաց Փաշինյանը։–0–
