Էս երկիրը որբի գլուխ չէ, որ ամեն տարի հրաժարական ու արտահերթ ընտրություն պահանջեք. Փաշինյանի աշխատակազմի ղեկավարի տեղակալն՝ ընդդիմությանը

ԵՐԵՎԱՆ, 18 մայիսի./Նովոստի-Արմենիա/. ՀՀ վարչապետի աշխատակազմի ղեկավարի տեղակալ Տարոն Չախոյանը Facebook-յան իր էջում մեկնաբանել է արտահերթ ընտրություններ անցկացնելու մասին լուրերը:

Նա նշել է, որ արտահերթ ընտրություններ անցկացնելու մասին լուրջ դեմքով խոսացող Իշխան Սաղաթելյանին (ԱԺ փոխխոսնակ, «Դիմադրություն» ընդդիմադիր շարժման առաջնորդներից մեկը) պետք է հիասթափեցնի։

«Չի լինելու, ոչ արտահերթ ընտրություններ և ոչ էլ վարչապետի հրաժարական։ Ստիպված եմ հիշեցնել օրեր առաջ արածս հայտարարությունը։ Վարչապետի հրաժարականի, արտահերթ ընտրությունների մասին կեղծ լուրեր տարածողներն ավելի շուտ սեփական ծոծրակը կտեսնեն, բայց հրաժարական չեն տեսնի։ Վերահաստատում եմ՝ էս երկիրը որբի գլուխ չէ, որ ամեն տարի հրաժարական ու արտահերթ ընտրություն պահանջեք», - նշել է Չախոյանը։-0-