ԵՊՀ-ում մեկնարկում է «Ամերիկագիտություն» առաջին մագիստրոսական կրթական ծրագիրը

ԵՐԵՎԱՆ, 9 դեկտեմբերի./Նովոստի–Արմենիա/. Երևանի պետական համալսարանում մեկնարկել է «Ամերիկագիտություն» առաջին մագիստրոսական կրթական ծրագիր, ինչպես նաև բացվել է Ամերիկյան հետազոտությունների կենտրոն։

Բացմանը ներկա է եղել ՀՀ-ում ԱՄՆ դեսպան Լին Թրեյսին։

Ւնչպես միջոցառման ժամանակ նշեց ԵՊՀ ռեկտորի պաշտոնակատար Հովհաննես Հովհաննիսյանը՝ կենտրոնի բացումը կրթական և հետազոտական բաղադրիչներ ունի: Այն արդյունք է ԵՊՀ-ի, ամերիկյան դեսպանատան և Արիզոնայի համալսարանի համագործակցության:

«Մեր գործընկեր կազմակերպությունը Արիզոնայի համալսարանն է, որի հետ մենք արդեն իսկ ունեինք համագործակցության փորձ: «Ամերիկագիտություն» ծրագրի շնորհիվ մեր ուսանողները հնարավորություն ունեն տարբեր ոլորտներում ստանալ բազմակողմանի գիտելիքներ, իսկ հետազոտողների համար սա բավականին լավ փորձառություն է, որպեսզի կարողանան տարբեր ոլորտներում հետազոտական աշխատանքներ իրականացնել»,-ասաց Հովհաննիսյանը:

Նրա խոսքով՝ հենց կենտրոնի հիմքի վրա էլ բացվել է «Ամերիկագիտություն» առաջին մագիստրոսական կրթական ծրագիրը, որի շրջանակում արդեն ուսանում է շուրջ 11 ուսանող:

«Ամերիկյան հետազոտությունների կենտրոնը կծառայի որպես ԱՄՆ հասարակական-քաղաքական իրողությունների շուրջ հետազոտությունների ու վերլուծությունների կարևոր կառույց»,-նշեց Հովհաննիսյանը։

Նա վստահեցրեց նաև, որ ԱՄՆ-ից կայցելեն պրոֆեսորներ, դասախոսական կազմ, որոնք հանդես կգան դասախոսություններով։

ԱՄՆ դեսպան Լին Թրեյսին էլ իր հերթին նշեց, որ կենտրոնի բացումը նշանակալի իրադարձություն է, քանի որ հայ ուսանողները հնարավորություն ունեն ուսումնասիրելու և ավելի լավ ճանաչելու ԱՄՆ-ն:

«Այս մագիստրոսական կրթական ծրագիրը հայ ուսանողներին հնարավորություն է տալիս այստեղ՝ Հայաստանում, ուսումնասիրել Միացյալ Նահանգների արտաքին քաղաքականությունը, դիվանագիտությունը, տնտեսությունը, հասարակությունը, և արդյունքում նրանք ձեռք կբերեն այնպիսի հմտություններ, որոնց շնորհիվ կկարողանան առավել լավ պատկերացնել ու հայ հասարակությանը պարզաբանել ամերիկյան հասարակաքաղաքական իրողությունները»,-ասաց դեսպան Թրեյսին՝ վստահեցնելով, որ մագիստրոսական ծրագիրը կարող է մեծ ներդրում ունենալ հայ-ամերիկյան հարաբերությունների ամրապնդման հարցում։

Նշենք, որ 2019թ.-ին դրամաշնորհ ստանալով ԱՄՆ դեսպանության հանրային դիվանագիտության գրասենյակից՝ ԵՊՀ-ն ձեռնամուխ եղավ Ամերիկյան հետազոտությունների կենտրոնի և «Ամերիկագիտություն» առաջին մագիստրոսական կրթական ծրագրի ձևավորման աշխատանքներին: Այս ծրագրի հիմքում ձևավորված Ամերիկյան հետազոտությունների կենտրոնը կծառայի որպես ԱՄՆ հասարակաքաղաքական իրողությունների շուրջ հետազոտությունների և վերլուծությունների կարևոր կառույց: Իսկ մագիստրոսական կրթական ծրագրով արդեն կատարվել է առաջին՝ 2021-22 ուստարվա ընդունելությունը:-0-