ԵՐԵՎԱՆ, 3 սեպտեմբերի./Նովոստի–Արմենիա/. Ռուսաստան մեկնել ցանկացողներն այսօր առավոտվանից բողոքի ակցիա են կազմակերպել կառավարության շենքի մոտ։
Նրանք ցանկանում են իմանալ հստակ ժամկետներ, թե երբ կկարողանան մեկնել Ռուսաստան։
Բողոքի ակցիան շարունակվեց ԱԳՆ–ի մոտ։ Ցուցարարներին մոտեցավ ԱԳ նախարար Զոհրաբ Մնացականյանը։
Նա կոչ արեց ցուցարարներին լինել ողջամիտ։
«Դուք հիմա ուզում եք, որ ես լուծեմ ուրիշ երկրի կանոնների փոփոխությունները։ Վարչապետը, ԱԺ–ում, բոլորը գիտեն այս խնդիրը։ Խնդրի լուծումը առկա չէ, քանի որ այն վերաբերում է այլ երկրի որոշումներին։ Բանակցություններ են ընթանում ոչ միայն Ռուսաստանի ուղղությամբ, այլ ընդհանուր առմամբ։ Մենք շարունակում ենք բանակցությունները, բայց դեռևս իրավիճակն այնպիսի չի, որպեսզի կանոնը (մուտքի արգելքի) փոխվի», – ասաց նախարարը։
Ցուցարարները նրան փոխանցեցին ՌԴ մեկնել ցանկացողների ցանկ։ Նախարարը խոստացավ ուսումնասիրել այն` միաժամանակ նշելով, որ որևէ երաշխիք տրամադրել չի կարող։
Մնացականյանը նշեց, որ Հայաստանն իր որոշումներն ընդունում է` ելնելով իր պահանջներից, որովհետև առաջին թիրախը մեր երկրում համավարակը նվազեցնելն է։
«Մենք հիմա կոնկրետ պայմանավորվածության չենք կարող գալ, որովհետև ձեր ասած «թողեք գնանք»–ը հնարավոր չի։ Ես ձեզ որևէ խոստում չեմ կարող տալ (ժամկետների հարցում)։ Դուք ուզում եք, որ ես ուրիշ երկրի կանոնների վերաբերյալ ձեզ խոստում տամ», – ասաց Մնացականյանը։
Քաղաքացիներից մեկն ասաց, որ Բելառուսում նույնպես համավարակը չի նահանջում, սակայն ՌԴ-ի հետ սահմանը բաց է, նախարարն արձագանքեց. «Դա իրենց որոշումն է, այնտեղ կա այլ կարգավիճակ։ Խնդիրը ծանոթ է, հասկանալի է, բայց լուծումն անմիջապես առկա չէ, որովհետև լուծումը վերաբերում է այլ երկրի որոշումներին»։–0–