ԵՐԵՎԱՆ, 24 մարտի./Նովոստի–Արմենիա/. Նախօրեից Երևանի փողոցներում և սոցցանցերի հայկական տիրույթում կրքերը չեն հանդարտվում՝ կապված քաղաքապետարանի կողմից Կասկադի տարածքում ծառերը հատելու մտադրության հետ։ Ըստ քաղաքային իշխանությունների՝ Կասկադի մոտ հին ծառերը կենսունակ չեն, ուստի նրանք ցանկանում են դրանք փոխարինել 8-10 տարեկան նոր տնկիներով։
Սակայն մայրաքաղաքի բնակիչները մտահոգություն են հայտնում։ Նրանք պնդում են, որ նոր տնկիները կտրվում են բարձրությամբ, ինչը նշանակում է, որ նրանք չեն մեծանա և ստվեր չեն գցի, կպահանջվեն տասնամյակներ, որպեսզի նրանք վերածվեն մեծ ծառերի։ Բնակիչներն առաջարկում են բուժել ծառերը կամ փոխարենը տնկել 15-20 տարեկան ծառեր։
Երևանի փոխքաղաքապետ Տիգրան Ավինյանը լրագրողների հետ զրույցում ասաց, որ 2023 թվականի ընթացքում Երևանում 2500 ծառ կփոխարինվի նորերով, իսկ Եռաբլուր զինվորական պանթեոնում կտնկվի մոտ 4000 ծառ։
«Սա նորմալ գործընթաց է։ Նույնիսկ սաղարթախիտ ծառերը, որոնք թվում է, թե կանաչ են, չեն կատարում իրենց գործառույթը։ Նոր ծառերը ստեղծվում են հատուկ քաղաքային միջավայրի համար»,- ասաց նա։
Ավինյանը նշեց, որ Կասկադում կհայտնվեն սակուրաներ, որոնք իրենց չափերով, ֆունկցիոնալությամբ և արտաքին տեսքով կհամապատասխանեն համալիրին։ Փոխքաղաքապետը նաև կարծում է, որ Երևանում պետք է լինեն ծիրանենիներ։
«Կանաչապատման և շրջակա միջավայրի պահպանություն» ՀԿ-ի տնօրեն Արմեն Բեգոյանն իր հերթին նշեց, որ սակուրաները կտնկվեն մոտ օրերս, իսկ մի քանի օրից ծառերն արդեն կծաղկեն։ Նրա խոսքով՝ 150 մլն դրամ է ծախսվել նոր ծառերի ձեռքբերման համար։
Նա ասաց, որ Սայաթ-Նովա պողոտայում՝ Ֆրանսիայի հրապարակից Տերյան փողոց ընկած հատվածում կնձնիները կփոխարինվեն կլոր սոսիներով, որոնք ավելի մեծ ֆունկցիոնալություն ունեն։
Կասկադի ծառահատումների շուրջ ծավալվող հասարակական դժգոհության կապակցությամբ Երևանի պետական բժշկական համալսարանի հիգիենայի և էկոլոգիայի ամբիոնի դոցենտ, բժշկական գիտությունների թեկնածու Քրիստինա Վարդանյանն իր հերթին նշեց, որ Կասկադի ծառերը չեն հատվելու։ Նրա խոսքով, ծառերը կփոխարինվեն նոր տեսակներով, որոնք կիրականացնեն փոշու մաքրման էկո-ֆունկցիա։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
