COVID-19-ի հակառեկորդները շարունակվում են, ՍԴ–ի շուրջ քաոս է, հայտնի դերասանի անժամանակ մահը. ամփոփում ենք նախորդ շաբաթվա լրահոսը
09:00
27 Հունիսի 2020
ԵՐԵՎԱՆ, 27 հունիսի./Նովոստի–Արմենիա/. Ներկայացնում ենք նախորդ շաբաթվա կարևոր նորությունների հնգյակը (հունիսի 22–26)։
Հունիսի 22-ին ԱԺ-ն երկրորդ ընթերցմամբ ամբողջությամբ ընդունեց ՍԴ-ն ցրելու նախագիծը: Փոփոխություններով առաջարկվում է Սահմանադրության 213–րդ հոդվածի նոր խմբագրություն, որով մասնավորապես առաջարկվում է 12 տարի պաշտոնավարած Սահմանադրական դատարանի դատավորի լիազորությունների ժամկետը համարել ավարտված: Փաշինյանը հայտնեց, որ սահմանադրական փոփոխությունները մտան ուժի մեջ, ԲՀԿ–ն էլ դիմեց ՍԴ։ Միաժամանակ հայտնի դարձավ, որ Հրայր Թովմասյանն ու ՍԴ դատավորներից ևս մեկն արձակուրդ են գնացել։
ԱԺ–ում կորոնավիրուսով վարակված պատգամավորների թիվն ավելանում է։
ՀՀ վարչապետ Նիկոլ Փաշինյանը հայտնեց, որ կորոնավիրուսի համաճարակի իմաստով Հայաստանը նոր հակառեկորդներ է սահմանում, և Հայաստանի Հանրապետությունը 1մլն բնակչին ընկնող վարակվածների թվով և ամենօրյա նոր վարակների թվով առաջատար տեղ է զբաղեցնում աշխարհում։ Դրա կապակցությամբ առաջիկայում ներդրվելու են ավելի խստացված կանոններ։
Ծիծեռնակաբերդի մոտակայքում բռնկվել էր խոշոր հրդեհ, որի մարման աշխատանքներին մասնակցում էր ավելի քան 120 փրկարար։
61 տարեկանում մահացել է հայտնի դերասան Գևոն։ Նրա գործընկերները սգում են դերասանի անժամանակ մահը։–0–