ԵՐԵՎԱՆ, 30 սեպտեմբերի./Նովոստի–Արմենիա/. Գերբնական ունակություններ ուենցող աղջկա մասին լուրը հաշված րոպեներում տարածվեց ամբողջ աշխարհում։ 22–ամյա Սաթենիկ Ղազարյանի մոտ արցունքների փոխարեն բյուրեղներ են գալիս։ Դա պարզապես անհավատալի է։
ՆՏՎ–ի թղթակիցն այցելել է Հայաստան, որպեսզի անձամբ հավաքի Սաթենիկի բյուրեղյա արցունքներն ու դրանք ուղարկի փորձաքննության։
Ամեն ինչ սկսվեց նրանից, որ Սաթենիկի փոքրիկ տղան ծաղկաման կոտրեց։ Աղջիկը որոշեց, որ կոտրված ծաղկամանից մի մասնիկ հայտնվել է նրա աչքում։ Դրանից հետո նա 3 ժամը մեկ աչքերից հանում է մոտ 10 բյուրեղ, այդ գործում նրան օգնում է սկեսուրը։ Դժվար չէ կռահել, որ պրոցեսը տանջալից ցավ է պատճառում։
Բժիշկները ենթադրում են, որ դա կարող է լինել ցիստինոզ` ամինաթթուների նյութափոխանակության բնածին խանգարում, որի ժամանակ մարդու մարմնում և հյուսվածքներում տեղի է ունենում ցիստինի բյուրեղների կուտակում։ Հիվանդությունը հազվադեպ է, հանդիպում է 200 հազար ծնվածներից մեկի մոտ։ Սակայն Մալայանի անվան ակնաբուժական կենտրոնում կարծում են, որ այս ողջ պատմությունը պարզապես հիանալի կրկեսային համար է։
Մասնագետները կարծում են, որ աղջիկը, հնարավոր է, տառապում է Մյունհաուզենի համախտանիշով։ Դա հոգեկան խանգարման տեսակ է, երբ մարդը վնասում է ինքն իրեն։ Իսկ ռուսական լաբորատորիայում հաստատել են, որ բյուրեղները պարզապես սովորական կոտրված ապակու մասնիկներ են։ Սակայն Սաթենիկն ու նրա քաղաքացիական ամուսինը պնդում է, որ ասում են ճշմարտությունը։–0–