ԵՐԵՎԱՆ, 16 նոյեմբերի./Նովոստի–Արմենիա/. «Բարգավաճ Հայաստան» կուսակցությունը երկուշաբթի հանդես է եկել հայտարարությամբ, որը վերաբերում է Փաշինյանի հայտարարությանը քաղաքական ուժերի հետ հանդիպման մասին։
«Այսօր Նիկոլ Փաշինյանն առաջարկել է խորհրդարանում հանդիպում խորհրդարանական քաղաքական ուժերի հետ: Առնվազն զարմանալի է, որ Նիկոլ Փաշինյանը միայն այսօր՝ կապիտուլացիոն փաստաթուղթը ստորագրելուց ու Արցախը հանձնելուց հետո է հիշում երկրի քաղաքական ուժերին», – ասվում է ԲՀԿ–ի հայտարարության մեջ, որը հրապարակվել է կուսակցության Facebook–յան էջում։
Հայտարարության մեջ նշվում է, որ «Բարգավաճ Հայաստան» և «Լուսավոր Հայաստան» կուսակցություններն այս ընթացքում քանիցս հրապարակավ պաշտոնապես դիմել են Նիկոլ Փաշինյանին՝ առաջարկելով օր առաջ կազմակերպել հանդիպում քաղաքական ուժերի հետ, ինչը, գուցեև, հնարավորություն տար մեղմացնելու արհավիրքը, նվազեցնելու զոհերը և տարածքային կորուստները:
Загружается новость ... "Лево"
«Նիկոլ Փաշինյանը մեր բոլոր հրապարակային կոչերն ու իրեն ուղղված հանդիպման առաջարկը մերժել է: Այսօր «Բարգավաճ Հայաստան» խորհրդարանական խմբակցությունը հայտարարում է. Նիկոլ Փաշինյանի հետ հանդիպումը կարող է կայանալ միմիայն և բացառապես մեկ օրակարգով՝ իր անցնցում հրաժարականի օրակարգով», – նշվում է ԲՀԿ–ի հայտարարության մեջ։
Այսօր ՀՀ վարչապետն առցանց ասուլիսի ժամանակ հայտարարեց, որ իր հրաժարականի հարց օրակարգում չկա։
Երևանում վերջին օրերին անցկացվում են բողոքի մասշտաբային ակցիաներ, որոնք կազմակերպվում են 17 ընդդիմադիր կուսակցությունների կողմից։ Նրանք պահանջում են Փաշինյանի հրաժարականը։ Քաղաքական գործիչներն ու շարքային քաղաքացիները վրդովվել են Փաշինյանի կողմից արցախյան հայտարարության ստորագրման պատճառով, որով նախատեսվում են տարածքային զգալի զիջումներ Ադրբեջանին։–0–