Ազատության հրապարակում լարված իրավիճակ է. բերման են ենթարկվել տասնյակ մարդիկ (ՈւՂԻՂ)

ԵՐԵՎԱՆ, 11 նոյեմբերի./Նովոստի–Արմենիա/. Երևանի Ազատության հրապարակում իրավիճակն ավելի է թեժանում։

Հիմա այնտեղ անցկացվոմ է 17 ընդդիմադիր կուսակցությունների հանրահավաքը։

«Հայրենիք» կուսակցության առաջնորդ Արթուր Վանեցյանը իր ելույթում հայտարարեց, որ հանրահավաքի նպատակն է հասնել վարչապետ Փաշինյանի հրաժարականին` ի նշան բողոքի Արցախի հարցով հայտարարության ստորագրման դեմ, որը նախատեսում է զգալի տարածքային զիջումներ Ադրբեջանին։


«Այսօր սկսվում է Հայրենիքի պաշտպանության շարժում։ Մենք կգնանք առաջ մինչև վերջ», – ասաց Վանեցյանը` կոչ անելով համաքաղաքացիներին միանալ հանրահավաքին։

Ինչպես դեպքի վայրից հայտնում է «Նովոստի–Արմենիա» գործակալության թղթակիցը, հավաքված քաղաքական գործիչներն ու շարքային քաղաքացիները պահանջում են Փաշինյանի հրաժարականը` վանկարկելով «Նիկոլ հեռացիր», «Նիկոլ դավաճան»։

Ոստիկանությունը բերման է ենթարկել հանրահավաքի մի քանի մասնակցի։ Նրանց թվում են պատգամավորներ, հասարակական և քաղաքական գործիչներ, Էդուարդ Շարմազանովը, Վահրամ Բաղդասարյանը և այլք։

Տարածքում են գտնվում նաև ԱԱԾ աշխատակիցներ։

Ոստիկանությունը բարձրախոսով զգուշացնում է քաղաքացիներին հեռանալ, քանի որ հանրահավաքների անցկացումն օրենքով արգելված է երկրում հայտարարված ռազմական դրության պայմաններում։–0–