Այս տարի զբոսաշրջիկները ՀՀ–ում ծախսել են ավելի քան 200մլն դոլար ավել գումար, քան նախորդ տարի. Փաշինյան

ՎԱՆԱՁՈՐ, 16 սեպտեմբերի./Նովոստի–Արմենիա/. 2019թ․–ի առաջին 6 ամիսների ընթացքում մի շարք երկրներից Հայաստան ժամանած զբոսաշրջիկների թիվը տպավորիչ աճ է արձանագրել:

Այս մասին հայտարարել է ՀՀ վարչապետ Նիկոլ Փաշինյանը Վանաձորում անցկացվող ասուլիսի ընթացքում։

«Մասնավորապես Գերմանիայից ժամանած զբոսաշրջիկների թիվն աճել է 59,9 տոկոսով, Չինաստանից ժամանածներինը` 53,5 տոկոսով, Նիդերլանդներից ժամանածներինը` 34, 9 տոկոսով, Շվեյցարիայից ժամանածներինը` 30 տոկոսով, ԱՄԷ–ից ժամանածներինը` 29,7 տոկոսով, Հունաստանից ժամանածներինը` 29 տոկոսով, Իտալիայից ժամանածներինը` 24,4 տոկոսով, Մեծ Բրիտանիայից ժամանածներինը` 22,9 տոկոսով, Ճապոնիայից ժամանածներինը` 22,2 տոկոսով, Ռուսաստանից ժամանածներինը` 19 տոկոսով, Շվեդիայից ժամանածներինը` 19 տոկոսով, ԱՄՆ–ից ժամանածներինը` 15 տոկոսով, Ֆրանսիայից ժամանածներինը` 13 տոկոսով», – նշեց ՀՀ վարչապետը` հավելելով, որ ընդհանուր առմամբ 2019թ.–ի առաջին կիսամյակում ունենք զբոսաշրջության 12,8 տոկոս աճ։

«ԿԲ–ի հաշվարկներով, այս տարի, արդեն օգոստոսը ներառյալ, նախորդ տարվա համեմատ, զբոսաշրջիկները Հայաստանում ծախսել են ավելի քան 200մլն դոլար ավել գումար, քան նախորդ տարի», – ընդգծեց ՀՀ վարչապետը։–0–