Այս տարի Ծիծեռնակաբերդի շուրջ 3.5 հեկտար տարածք է կանաչապատվելու
ԵՐԵՎԱՆ, 7 մարտի./Նովոստի–Արմենիա/. «Կանաչապատում և շրջակա միջավայրի պահպանություն» ՀՈԱԿ-ի համար Երևան քաղաքում կանաչ տարածքների հնարավորինս շատ լինելը առաջնային հարց է: Այդ առումով 2022 թ.-ի համար ՀՈԱԿ-ը ունի մի շարք ծրագրեր, որոնք օգնելու են ունենալ ավելի կանաչ Երևան:
Այս մասին ասյօր կայացած ասուլիսի ժամանակ ասաց Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի դենդրոլոգ Արծվի Գրիգորյանը:
Արծվի Գրիգորյանի խոսքով՝ Ծիծեռնակաբերդում մոտ 8 հեկտար տարածքի կանաչապատում է սպասվում:
«Քանի որ այն միանգամից իրականացնելու հնարավորությունները մենք չունենք, այդ պատճառով որոշել ենք փուլային անել: Այս տարի մոտ 3.5 հեկտար տարածք ենք կանաչապատելու: Եվ´ ծառերի, և´ թփերի գնումներն արդեն հայտարարել ենք: Այս տարի Երևան քաղաքում և մեր ապասարկող գոտիներում պետք է տնկվի 4 000 նոր ծառ և 75 000 թփատեսակ»,-ասաց Գրիգորյանը:
Ինչ վերաբերում է Կարեն Դեմիրճյանի անվան մարզահամերգային համալիրի հարակից տարածքներին դենդրոլոգ Արծվի Գրիգորյանը նշեց, որ կանաչապատում իրականացնելիս օգտագործվելու են և´ պտղատու, և´ դեկորատիվ ծառերի տեսակներ:
«Քանի որ հողային տարածքները շատ վատն են, մենք հողագիտական վերլուծություն ենք անցկացրել, և պարզվել է, որ հումուսի պարունակությունը շատ ցածր է: Ուստի այս տարի պայմանավորվածություն ենք ձեռք բերել քաղաքապետի հետ, որպեսզի Կոտայքի մարզից մեզ որոշակի հող տրամադրեն: Նոր հողախառնուրդի մեջ 1-2 տարի տնկիները կադապտացվեն և կսկսեն նորմալ աճել»,-ասաց դենդրոլոգը:
Նրա խոսքով՝ հատկապես անտառ-պուրակներ կանաչապատելիս օգտագործվում է մոտ 500 ծառ և 1500-2 000 թուփ:
«Այս տարի 2 260 ծառ և 3 000 թուփ կօգտագործվի Ծիծեռնակաբերդի տարածքի համար: Վայրի պտղատու ծառերի տեսակներից լինելու են նշենի, ծիրանենի, սալորենի, գեղազարդ ծառերի տեսակներից էլ կլինեն հացենի, արոսենի: Իսկ համալիր տանող աստիճանների աջ ու ձախ կողմերի համար նախատեսել ենք արևելյան սոսի, որը մեծ սախարթներ ունեցող ծառ է»,-ասաց նա:
Դենդրոլոգը նշեց, որ եթե այս տարի սկսեն կանաչապատման գործընթացը, ապա անտառ-պուրակներն իրենց վերջնական տեսքը կստանան մոտ 5-7 տարի հետո:
«Բոլոր տնկիներն էլ մոտավորապես 2 մետրի սահմաններում տնկիներ են, և երբ սկսեն կանաչել, մարդիկ արդեն կտեսնեն: Հիմա իրականացնում ենք հողափոսերի փորումն ու ոռոգման համակարգի վերականգնումը: Այդ 3.5 հեկտարը պետք է ամեն ինչ անենք, որ այս տարի անպայման տնկենք ու պատրաստի ունենանք»,-ասաց նա:
Նա հավելեց նաև, որ այս տարի 3.5 հեկտարն են կանաչապատելու: Մյուս հատվածների մաքրման աշխատանքներն էլ սկսվել են, և հաջորդ աշնանից արդեն կանցնեն մյուս տարածքների կանաչապատմանը:–0–
