Ավտոբուսի վարորդն իրեն ագրեսիվ է պահել, ծխախոտը դուրս է նետել. նրան հեռացրել են աշխատանքից (ՎԻԴԵՈ)

ԵՐԵՎԱՆ, 2 մայիսի./Նովոստի–Արմենիա/. Նախորդ շաբաթ Facebook–ում գրառում էր տեղադրվել, որտեղ քաղաքացիներից մեկը բողոքում է ավտոբուսի վարորդի ոչ հարիր պահվածքից: Այս մասին այսօր Երևանի քաղաքապետարանի գործակարգավարական խորհրդակցության ժամանակ նշեց քաղաքապետի պաշտոնակատար Լևոն Հովհաննիսյանը:

«Գրառման մեջ ասվում էր, որ վարորդը ագրեսիվ է իրեն պահել վարելու ընթացքում, ծխել է, մնացորդը դուրս է նետել և նաև ուղևորներին պարբերաբար հորդորել է, որ մանրադրամը փոխանցեն իրեն»,-ասաց նա:

«Երևանի ավտոբուս» ԲԲԸ տնօրեն Հովհաննես Մանուկյանն իր հերթին նշեց, որ բոլոր ավտոբուսներում տեղադրված են տեսախցիկներ, իրենք դիտել են տվյալ տեսանյութը։

«Հաստատվեց, որ վարորդն իրեն շատ վատ է պահել, ուղևորին թույլ չի տվել դրամը գցել արկղի մեջ, ասել է՝ տվեք ինձ: Այո, ծխել է և ծխախոտը դուրս է նետել: Այդ ամեն ինչը մեզ մոտ ֆիքսված է։ Այդ վարորդը հեռացվել է աշխատանքից: Մենք ամենօրյա ռեժիմով բոլոր վարորդներին հորդորում ենք, որ ղեկին չծխեն, բոլորը լինել են սափրված, մաքում, ավտոբուսները լինեն մաքուր: Եթե կլինեն վարորդներ, որ կշարունակեն ծխել, կհեռացվեն աշխատանքից», – ասաց Մանուկյանը։

Նա քաղաքացիներին կոչ արեց ավտոբուս բարձրանալիս ունենալ 100-դրամանոց և անմիջապես գցել արկղը։–0–