Ավինյանը բացառել է «Նեմեսիսի» հուշարձանի ապամոնտաժումը

ԵՐԵՎԱՆ, 11 մայիսի./Նովոստի–Արմենիա/. Երևանի փոխքաղաքապետ Տիգրան Ավինյանը բացառել է, որ «Նեմեսիսի» հուշարձանը քաղաքապետարանի որոշմամբ հնարավոր է ապամոնտաժվի։

«Այդ արձանը նվիրված է ազգային արժանապատվության ասպետներին։ Այն որևէ ժողովրդի, որևէ երկրի դեմ չէ։ Շատ քաղաքականացնել հարցը, ինչն անում է Թուրքիայի արտգործնախարարությունը, տեղին չէ, որովհետև եթե անընդհատ նույն թեմաները քննարկենք, կարող ենք հասնել Ծիծեռնակաբերդի հուշահամալիրին, դա էլ կարող է հարց առաջացնել թուրք պաշտոնյանների մոտ։ Սա մեր ներքին հարցն է, որևէ մեկը չի կարող դրա հետ կապ ունենալ»,- ասաց Ավինյանն այսօր լրագրողների հետ զրույցում։

Նա նաև նշեց, որ արձանի տեղադրման որոշումն ընդունվել է Երևանի ավագանու կողմից 2021 թվականին։ Կառավարությունը որևէ կապ չի ունեցել։


Արձագանքելով այն դիտարկմանը, որ ՀՀ վարչապետ Նիկոլ Փաշինյանը հայտարարել էր, որ արձանի տեղադրման որոշումը սխալ է` Ավինյանը նշեց, որ Երևանի քաղաքապետարանն այդ որոշումը 2021 թվականին չի համաձայնեցրել։

«Կարծում եմ, որ նմանատիպ որոշումները պետք է քննարկվեն կառավարության և Արտաքին գործերի նախարարության հետ։ Վստահաբար այդտեղ սխալ բան կա։ Արձանի տեղադրումից առաջ մենք Թուրքիայի արձագանքի վերաբերյալ որևէ քննարկում, մտահոգություն չենք ունեցել»,- նշեց Ավինյանը։

Օսմանյան կայսրությունում Հայոց ցեղասպանության կազմակերպիչներին ոչնչացրած «Նեմեսիս» գործողության հերոսների հիշատակը հավերժացնող հուշակոթողի տեղադրումը, ըստ թուրքական իշխանությունների հայտարարության, դարձել է Թուրքիայի օդային տարածքը հայկական ավիաընկերությունների համար փակելու պատճառ։ Ավելին, Թուրքիայի ԱԳՆ ղեկավարը սպառնացել է նոր միջոցներ ձեռնարկել Հայաստանի դեմ՝ հուշարձանի ապամոնտաժումից հրաժարվելու դեպքում։-0-