Ատամներ, պարեր և դասագրքեր․ կառավարությունն ընդլայնել է ծառայությունների ցանկը, որոնք կարելի է վճարել «սոցիալական վարկի» միջոցով
ԵՐԵՎԱՆ, 13 փետրվարի․/Նովոստի–Արմենիա/․ Հինգշաբթի ՀՀ կառավարության նիստում ընդունվեց նախագիծ, որով ընդլայնվում է այն ծառայությունների ցանկը, որոնց ծախսերը կարելի է հոգալ «սոցիալական վարկ» ծրագրով։
Փաստաթղթի համաձայն՝ վճարված եկամտահարկի վերադարձի միջոցով կարող են փոխհատուցվել կրթության և սպորտի ծախսերը, մասնավորապես՝ երաժշտական և պարային դպրոցների, արվեստի այլ տեսակների, արտադպրոցական ուսումնական հաստատությունների և կենտրոնների, ինչպես նաև մանկապատանեկան մարզադպրոցների վճարները։ Կրթության, գիտության, մշակույթի և սպորտի նախարարության կողմից հաստատված արտադպրոցական դասընթացների և ծրագրերի ծախսերը նույնպես կարող են վերադարձվել։
Բացի այդ, դպրոցներում և միջնակարգ մասնագիտացված ուսումնական հաստատություններում դասագրքերի վարձակալության ծախսերը կարող են փոխհատուցվել մինչև 3 հազար դրամի չափով։ Փոխհատուցվող ծառայությունների ցանկում ներառված են նաև ատամնաբուժական ծառայությունները (50 հազար դրամից ոչ ավելի):
ՀՀ ֆինանսների նախարար Վահե Հովհաննիսյանը նշեց, որ օրենքը հետադարձ ուժ ունի, և 2024 թվականին կատարված ծախսերը կարող են փոխհատուցվել, սակայն անհրաժեշտ է, որ դրանք վճարվեն անկանխիկ եղանակով։
Միաժամանակ, ՀՀ վարչապետ Նիկոլ Փաշինյանը կարևոր պարզաբանում արեց՝ եթե քաղաքացին օգտվում է այլ ծրագրերից, որոնցով իրեն վերադարձվում է եկամտահարկի մի մասը, օրինակ՝ հիփոթեքի տոկոսները վճարելու համար, ապա «սոցիալական վարկից» օգտվելու համար անհրաժեշտ է, որ իր վճարած հարկերից մնա առնվազն 100 հազար դրամ։
