Աստղազարդ երկնքի տակ. Արագած լեռան ձնհալից առաջացած լճի վրա ապակյա տնակներ կտեղակայվեն (ՖՈՏՈ)
ԵՐԵՎԱՆ, 23 նոյեմբերի./Նովոստի–Արմենիա/. Հայաստանում նախատեսվում է իրականացնել բացառիկ տուրիստական նախագիծ` Արագած լեռան ձնհալից առաջացած լճի վրա տեղակայել ապակյա տնակներ, որտեղ այցելուները կարող են գիշերել և հիանալ աստղերով։
Այս նախաձեռնությունը կիրագործվի Բյուրական համայնքում` Rural Culture սոցիալական ձեռնարկատիրության մոդելի շրջանակում։
Ինչպես տեղեկացրեց նախաձեռնության հիմնադիր Աննա Հովհաննիսյանը, ծրագրերն ամբողջությամբ իրականացնելու համար անհրաժեշտ է ավելի քան 1 մլն դոլար։
«Սակայն մենք կարողացանք գրավել փորձագետների և Հայաստանի ու այլ երկրների գործընկեր–գերատեսչությունների վստահությունը, և դրա շնորհիվ` սկզբնական կապիտալ ներդրումները, որոնք անհրաժեշտ են շինարարական աշխատանքների համար, գնահատվել են 150 հազար դոլար, որոնք մենք կկիսենք 3 հազար մարդու շրջանում», – նշեց նա։
Հովհաննիսյանը պարզաբանեց, որ մարդիկ հնարավորություն կստանան 50 դոլարի դիմաց դառնալ նախագծի գործընկեր` փոխարենը ստանալով որոշ ծառայություններ և բոնուսներ, մասնավորապես, լճի ափին` տնակում գիշերելու իրավունք։ Հետագայում տնակում գիշերակացը կարժենա 100 դոլար։
Լուսանկարը` FB / @RuralCultureTravel
«Նախատեսվում է կազմակերպել դրամահավաք մինչև ապրիլ, իսկ հետո` հաջողության դեպքում, շինարարական աշխատանքների համար կպահանջվի մեկ տարի, ևս 2–3 տարի` փորձարկումների համար։ Այս ամենից հետո` 2021թ.–ի երկրորդ կեսին, նախագիծը կգործարկվի», – նշեց Հովհաննիսյանը։
Նախագծի համաձայն, նախատեսվում է կառուցել յոթ տնակ Արագած լեռան ձնհալից առաջացած լճի վրա։
Հիմնական նպատակներն են համայնքի համաչափ զարգացումը, Հայաստանում այլընտրանքային տուրիզմի ձևավորումը և այլն։
Հովհաննիսյանը նաև ներկայացրեց Responsible Agricultural Travel փաթեթային նախաձեռնությունը, որի ուղղորդմամբ այցելուները հնարավորություն կունենան փորձառություն ստանալ Հայաստանի գյուղական համայնքներում, ինչպես նաև փոխանցել իրենց փորձառությունը հյուրընկալող ընտանիքներին։ Հետագայում, հաջողության դեպքում, նախատեսվում է ստեղծել տեղեկատվական բազա, որի հիման վրա զբոսաշրջիկները կկարողանան ինքնուրույն կապ հաստատել տեղացիների հետ։–0–
