Արմեն Չարչյանն ազատ արձակվեց

ԵՐԵՎԱՆ, 10 դեկտեմբերի./Նովոստի–Արմենիա/. Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, վերադառնալով խորհրդակցական սենյակից՝ հրապարակեց «Հայաստան» խմբակցության պատգամավոր, «Իզմիրլյան» ԲԿ–ի նախկին տնօրեն, պրոֆեսոր Արմեն Չարչյանի գործով միջնորդության վերաբերյալ որոշումը՝ վերացնելով նրա նկատմամբ խափանման միջոց կալանքը:

Արմեն Չարչյանն ազատ արձակվեց նիստերի դահլիճից:

Դատավորը հայտարարեց, որ խափանման միջոց է ընտրվում ստորագրությունը չհեռանալու մասին:

Հիշեցնենք, որ Սահմանադրական դատարանը նախօրեին հրապարակել էր դեկտեմբերի 7-ի որոշումը, ըստ որի պատգամավոր ընտրված անձինք չեն կարող լինել անազատության մեջ:

Չարչյանը կալանավորվել էր ամռանը: Նրան մեղադրանք է առաջադրվել ՀՀ ՔՕ 154.2-րդ հոդվածի 4-րդ մասի 2-րդ կետով նախատեսված հանցանք կատարելու կասկածանքով (ընտրողներին կաշառք տալը, ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը):–0–