ԵՐԵՎԱՆ, 16 հունիսի./Նովոստի–Արմենիա/. ՀՀ գլխավոր դատախազ Արթուր Դավթյանը երեքշաբթի միջնորդություն է ներկայացրել ԲՀԿ առաջնորդ Գագիկ Ծառուկյանին ազատությունից զրկելու մասին։
Այսօր ԱԺ–ում կազմակերպված փակ քվեարկության արդյունքում Ծառուկյանը
զրկվեց պատգամավորական անձեռնմխելիությունից։ Քվեարկությանը մասնակցեց միայն «Իմ քայլը» խմբակցությունը, «Լուսավոր Հայաստան» և «Բարգավաճ Հայաստան» խմբակցությունները հրաժարվեցին մասնակցել։
Դավթյանի խոսքով, մեղադրանքներն առաջադրվելու են ՔՕ 38–154–րդ հոդվածի հատկանիշներով (քվեարկության գաղտնիությունը խախտելը)։
Загружается новость ... "Лево"
Որպես ազատությունից զրկելու հիմնավորում Դավթյանը նշեց, որ Ծառուկյանը, լինելով ազատության մեջ, կարող է օգտագործել ունեցած քաղաքական և ֆինանսական ռեսուրսները, ինչպես նաև իր հեղինակությունը` քննությանը խոչընդոտելու համար։
Ծառուկյանի շուրջ իրադարձությունների մասին
Հունիսի 14–ին առավոտյան ԱԱԾ աշխատակիցները խուզարկել են «Բարգավաճ Հայաստան» կուսակցության ղեկավար և գործարար Գագիկ Ծառուկյանի առանձնատունը:
Խուզարկությունից հետո ԲՀԿ առաջնորդը հայտարարել է, որ իր վրա գործադրում են քաղաքական ճնշում, սակայն ինքը հետքայլ չի անի:
Այնուհետև Ծառուկյանը կանչվել է ԱԱԾ հարցաքննության, որտեղ շուրջ 9 ժամ հարցաքննվելուց հետո դուրս եկել ԱԱԾ շենքից:
ԱԱԾ-ն նույն օրը տարածել է մի շարք հաղորդագրություններ:
Հաղորդագրություններից մեկը վերաբերում է Ծառուկյանի ընտանիքին պատկանող «Շանգրի Լա» և «Օնիրա Քլաբ» ընկերությունների ապօրինի գործունեության հետևանքով պետությանը պատճառված ավելի քան 29 միլիարդ դրամի վնասին:
Ըստ մյուս հաղորդագրության, բացահայտվել են 2017 թ.-ին ԱԺ ընտրությունների ժամանակ ԲՀԿ–ի կողմից ընտրողներին կաշառք տալու, կաշառք ստանալու հարյուրավոր դեպքեր:
Իսկ ավելի ուշ ԱԱԾ-ն հաղորդագրություն տարածեց Առինջ համայնքի պաշտոնատար անձանց կողմից համայնքի բյուջեին 339.300.000 դրամի վնաս հասցնելու դեպքի մասին, որի առթիվ քրգործ է հարուցվել:-0-