7–ժամյա՞, թե՞ 23–ժամյա ջրանջատում․ Աջափնյակում ջրանջատման հայտարարությունը խմբագրվել ու թարմացվել է, իսկ քաղաքացիները շուրջ մեկ օր մնացել են առանց ջուր

ԵՐԵՎԱՆ, 21 օգոստոսի․/Նովոստի–Արմենիա/․ Նախօրեին «Վեոլիա ջուր» ընկերությունն իր Տելեգրամի ալիքում 17։01 հայտարարություն է տարածում այն մասին, որ օգոստոսի 20–ին ժամը 17։00–ից մինչև 00։00 կդադարեցվի Երևանի Աջափնյակ վարչական շրջանի Նորաշեն, Նազարբեկյան, Բեկնազարյան Գ-1 թաղամասերի, Չաուշ փողոցի, Բաշինջաղյան 2 նրբ 6, 8-10, 12 զույգ համարի շենքերի ջրամատակարարումը:

Ինչպես «Նովոստի–Արմենիա» գործակալությանը հայտնեցին աջափնյակցիները, գիշերը 12–ին ջրամատակարարումն այդպես էլ չի վերականգնվել։ Այսօր առավոտյան «Վեոլիա ջուրը» խմբագրում է Տելեգրամում տարածած իր հայտարարությունն ու տարածում է նորը՝ փոխելով ջրանջատման վերականգնման ժամը և դարձնելով օգոստոսի 21–ին ժամը 16։00։

Այսպիսով, Երևանի մի ամբողջ հսկայական թաղամաս շուրջ 23 ժամով ջրանջատվել է՝ պատշաճ չիրազեկվելով այդ մասին։